ტყიბულში ტრაგიკულად დაღუპული ექვსი მეშახტიდან ხუთს დღეს დაკრძალავენ. კიდევ ერთ დაღუპულს კი ხუთშაბათს დაასაფლავებენ.

სამგლოვიარო პროცესია 14:00 საათზე დაიწყება.

5 აპრილს მინდელის შახტში მომხდარი ტრაგიკული შემთხვევის მიზეზის დადგენას ითხოვს არასამთავრობო სექტორი. ისინი მომხდარის გამო ეკონომიკური გუნდის პასუხისმგებლობის საკითხზე საუბრობენ.

„ჩვენ კვლავ ვაყენებთ მოთხოვნას, რომ ეკონომიკურმა გუნდმა აიღოს პოლიტიკური პასუხისმგებლობა იმ შემთხვევებზე, რომელიც წლების განმავლობაში ხდება საქართველოში. პოლიტიკური პასუხისმგებლობა უნდა გამოიხატებოდეს დიმიტრი ქუმსიშვილის გადადგომაში, თუმცა ეს უნდა იყოს მესიჯი მთავრობის მხრიდან, რომ ის ამით იაზრებს არსებულ პოლიტიკას და აპირებს, რომ სხვანაირად გაატაროს ის, რაშიც უნდა მოხვდეს შრომის კანონმდებლობის და პოლიტიკის გადახედვა,“-განაცხადა ადამიანის უფლებების სწავლებისა და მონიტორინგის ცენტრის წარმომადგენელმა ლინა ღვინიანიძე.