"თუ ვინმეს აზრად მოუვა შეურაცხყოფა მიაყენოს ჩვენს გმირებს, მან კანონის სრული სიმკაცრით უნდა აგოს პასუხი“

"თუ ვინმეს აზრად მოუვა შეურაცხყოფა მიაყენოს ჩვენს გმირებს, მან კანონის სრული სიმკაცრით უნდა აგოს პასუხი“ - „ახალგაზრდები ევროპული მომავლისთვის“

საზოგადოება - 15:39, 05 Apr, 2018

1436

„ახალგაზრდები ევროპული მომავლისთვის“ „ალბატროსში“ განვითარებულ მოვლენებთან დაკავშირებით განცხადებას ავრცელებს:

„გვინდა გამოვეხმაუროთ კომპანია „ალბატროსის“ ადმინისტრაციის ხელმძღვანელობასა და პიარ-მენეჯერ სალომე სარიშვილის დაპირისპირების ფაქტს. მიგვაჩნია, რომ ყოვლად მიუღებელია არჩილ ტატუნაშვილის, ჩვენი ეროვნული გმირის მოხსენიება იმ შეურაცხმყოფელი სიტყვებით, რაც სალომე სარიშვილის აღშფოთების საფუძველი გახდა.

ჩვენ, ახალგაზრდები ევროპული მომავლისთვის, სოლიდარობას ვუცხადებთ ქ.სალომეს და მაქსიმალურად ჩავერთვებით ამ საქმის დეტალურ გარკვევაში. ჩვენ კომპანია „ალბატროსი“-სგან მოვითხოვთ დაუყოვნებლივ განთავისუფლდეს უსაფრთხოების სამსახურის უფროსი, იაგო ოთარაშვილი და ქ. მადინა თვაური, რომელიც ჩვენი ინფორმაციით ეთნიკურად ოსია და სწორედ ეს გახდა მთავრი მოტივი ჩვენი ეროვნული გმირის შეურაცხყოფის.

რუსეთი ოკუპანტია და ყველამ უნდა გავითავისოთ, რომ ჩვენ ყველა საქართველოს შვილები ვართ და თუ ვინმეს მოუვა აზრად სხვადასხვა სახით მიაყენოს შეურაცხყოფა ჩვენს გმირებს, ჩვენს ქვეყანას, მან აუცილებლად უნდა აგოს პასუხი კანონის სრული სიმკაცრით“, - ნათქვამია განცხადებაში.

შეგახსენებთ, რომ კომპანია „ალბატროსში“ არჩილ ტატუნაშვილის ხსოვნისადმი მიძღვნილ ღონისძიებას ადმინისტრაციის მხრიდან დაპირისპირება მოჰყვა.

კომპანიის პიარ-მენეჯერ სალომე სარიშვილის ინიციატივით, არჩილ ტატუნაშვილის გატაცების დღიდან, კომპანია ალბატროსში , მისი მხარდასაჭერი კამპანია დაიწყო, რაც სოციალურ ქსელში განცხადებისა და კომპანიაში საინფორმაციო ფლაერების გავრცელებაში გამოიხატებოდა. შაბათს კომპანიაში, კამპანიის ფარგლებში გააკრეს არჩილ ტატუნაშვილის ფოტოები სლოგანებით -„დიდება გმირებს“, „რუსეთი ოკუპანტია“ და ა.შ. რომლებიც ორშაბათს ჩამოხეული დახვდათ.

კომპანია „ალბატროსში“ არჩილ ტატუნაშვილის ხსოვნისადმი მიძღვნილ ღონისძიებას ადმინისტრაციის მხრიდან დაპირისპირება მოჰყვა.