კომპანია „სვანეთი ჰიდრო“ „ჭალა ჰესის“ წინააღმდეგ აქციას ეხმაურება - ,,მშენებლობის დაწყებამდე კოპანიამ ყველა კითხვას პასუხი გასცა“

საზოგადოება - 18:22, 31 Mar, 2018

2233

მესტიაში ჭალა ჰესის მშენებლობის წინააღმდეგ დღეს გამართულ საპროტესტო აქციას ეხმაურებიან კომპანია „სვანეთი ჰიდროს“ წარმომადგენლები.

როგორც ,,ნიუპოსტს“ კომპანიის საინფორმაციო ცენტრის ხელმძღვანელმა სოფო ნატროშვილმა განუცხადა, მშენებლობა ერთი წელია მიმდინარეობს და ამ დრომდე მოსახლეობის მხრიდან წინააღმდეგობა არ ყოფილა. ნატროშვილის ინფორმაციით, კომპანია შეხვდა იმ ჯგუფს, რომელიც პროტესტს გამოთქვამს და ამომწურავი ინფორმაცია მიაწოდეს მშენებლობის შესახებ.

ნატროშვილი აქციის მონაწილეების ქმედებას პროვოკაციულს უწოდებს და ამბობს, რომ ექსპერტებთან ერთად შეთანხმებულ შეხვედრას აღნიშნული ჯგუფი არ დაესწრნენ.

„უპირველეს ყოვლის, გვინდა აღვნიშნოთ, რომ მესტიაჭალა ჰესი არის მწვანე, მცირე ზომის, არადაგუბებითი, მდინარის მოდინებაზე აგებული ჰესი, რომელიც მსოფლიოში აღირებულია, როგორც ყველაზე უსაფრთხო და გარემოზე მინიმალური ზემოქმედების მქონე.

მშენებლობა უკვე 1 წელია მიმდინარეობს და ამ პერიოდში, მოსახლეობის მხრიდან არანაირი წინააღმდეგობა არ ყოფილა. დღეს, მესტიაჭალა ჰესის მშენებლობას ეწინააღმდეგება მხოლოდ 10-15 ადამიანისგან შემდგარი ჯგუფი. ჩვენ საგაზაფხულო მშენებლობის დაწყების წინ რამდენჯერმე შევხვდით მათ და ყველა კითხვაზე ამომწურავი პასუხი გავეცით, თუმცა აღსანიშნავია, რომ ჯგუფის წევრებს არ სურთ არგუმენტირებული პასუხების მოსმენა. ასევე, ბოლო შეხვედრაზე შევთანხმდით ეკონომიკისა და მდგრადი განვითარების სამინისტროში, ექსპერტების მონაწილეობით საკითხის განხილვაზე. სამწუხაროდ, აღნიშნული ჯგუფის წარმომადგენლები შეთანხმებულ და ტელევიზიით დაანონსებულ შეხვედრას არ დაესწრნენ. დღეს კი ისინი პროვოკაციას მიმართავენ, ტრანსპორტის მოძრაობას აფერხებენ.

რაც შეეხება სამუშაოებს - ამ ეტაპზე იწმინდება გზა და მდინარის კალაპოტის გასწვრივ ნაპირსამაგრები ეწყობა. ჩვენ მესტიაჭალა ჰესის მშენებლობას დაგეგმილი გრაფიკით ვაგრძელებთ“ - განუცხადა ,,ნიუპოსტს“ „სვანეთი ჰიდროს“ საინფორმაციო ცენტრის ხელმძღვანელმა სოფო ნატროშვილმა.