ტატუნაშვილის ოჯახს "სუხიშვილებმა" მიუსამძიმრეს

საზოგადოება - 18:38, 23 Mar, 2018

2886

ოკუპანტების მიერ მოკლული არჩილ ტატუნაშვილის სამოქალაქო პანაშვიდი გრძელდება. წილკანში ნაციონალურ ბალეტ „სუხიშვილების“ მოცეკვავეები ჩავიდნენ და ტატუნაშვილის ოჯახს მიუსამძიმრეს.

„ანსამბლის ნაწილი გასტროლზე იმყოფება, ჩვენ ნინო და ილიკო სუხიშვილების და დასის სახელით მოვედით რათა პატივი მივაგოთ ჩვენი გმირის, არჩილ ტატუნაშვილის ხსოვნას.“- განაცხადა ცეკვის აკადემია „სუხიშვილების“ დირექტორმა ნინომ შარაშიძემ.

35 წლის სამხედრო, არჩილ ტატუნაშვილი მიმდინარე წლის 22 თებერვალს, ახალგორში, ორ სხვა ქართველთან ერთად, დააკავეს.

მომდევნო დღეს კი, საოკუპაციო რეჟმმა ინფორმაცია გაავრცელა, სადაც ე.წ. სამხრეთ ოსეთის უშიშროების კომიტეტი ირწმუნებოდა, რომ ტატუნაშვილი ცხინვალის საავადმყოფოში გულის უკმარისობით გარდაიცვალა.

ტატუნაშვილის ოჯახის წევრები აცხადებენ, რომ სამხედრო სასტკად ნაწამებია.

არჩილ ტატუნაშვილს 24 მარტს, მუხათგვერდის ძმათა სასაფლაოზე დაკრძალავენ.

35 წლის სამხედროს სიკვდილთან დაკავშირებით, საპარლამენტო უმრავლესობამ რეზოლუცია მოამზადა, რომელიც საქართველოს პარლამენტმა ოკუპირებულ აფხაზეთსა და სამხრეთ ოსეთში ადამიანის უფლებების დარღვევის შესახებ რეზოლუცია მიიღო. რეზოლუცია ითვალისწინებს „ტატუნაშვილი-ოთხოზორიას სიის“ მიღებას, რომელშიც ოკუპირებულ ტერიტორიებზე საქართველოს მოქალაქეების გატაცების, წამების, მკვლელობის საქმეში ჩართული პირები მოხვდებიან და მათ წინააღმდეგ სანქციები დაწესდება. პარლამენტი ასევე მოუწოდებს მთავრობას, მიიღოს ზომები, რათა ამ პირთა წინააღმდეგ დაწესდეს შეზღუდვები, პარტნიორი ქვეყნებისა და სართაშორისო ორგანიზაციების მხრიდანაც.

ფოტო - პირველი არხი