აქცია ლაითურში - ბიძინა ივანიშვილის კომპანიის წარმომადგენელი მანქანით ადგილობრივს დაეჯახა

საზოგადოება - 17:35, 19 Mar, 2018

2997

ამ წუთებში ლაითურის მოსახლეობამ მერია-ლაითურის მთავარი გზა გადაკეტა. საიდანაც ხის ტრანსპორტირება ხდება. მასშტაბურ აქციაზე ადგილობრივები მძიმეწონიანი მანქანების გადაადგილების აკრძალვას ითხოვენ. მათი განცხადებით, ერთ-ერთი სატვირთო დღეს ქალბატონს დაეჯახა, პოლიცია კი, ხალხის პროტესტზე არ რეაგირებს.
"ღამის ხუთ საათზე მოდის რიხინით. არც ქალს ინდობენ, არც ბავშვს, არც ძროხას. გზაზე სულერთია ვინ მოძრაობას, დაეჯახა აგერ ქალს და ვითომც არაფერი. ჭაში წყალი აღარ გვაქვს, ხეები გაჩეხილია, სახლები ზანზარებს, გადათხრილია მთელი ლაითური"
"პოლიცია საერთოდ არ რეაგირებს ამაზე, აგდებული ვყავართ ამათ. ჩვენ ვითომ ადამიანები არ ვართ"
"არ გავატარებთ ამ მანქანებს. დღეს გადავუდექით წინ და ფაქტიურად გადაგვიარა და გაიარა. ქვები დავუშინეთ მერე"
"მოშორდეს ეს მანაქანები აქედან. აიკრძალოს მათი მოძრაობა. დავიტანჯეთ ხალხი. ისედაც მძიმე მდგომარეობაა აქ და კიდე ამათგან დამატებული პრობლემები გვინდა"
"პატარა ბავშვები ყველა ქუჩაში გადმოდის სათამაშოდ. ეს მანქანები გიჟებივით დადიან. 5 ტონა თუ უნდა მიჰქონდეთ, მიაქვთ 50 ტონა. პოლიცია იყო, ალტერნატიული გზით უნდა იაროთო უთხრეს მძროლებს. ვიღაცა მძღოლი გადმოხტა დღეს, ივანიშვილი და პოლიცია ჩვენიაო, ივანიშვილის წარმომადგენელი ვარო. მანქანა დაარტყა ქალს და წავიდა."- -აცხადებენ აქციაზე შეკრებილები.

„ახალი ხე მოჭრა კაცმა, რომ მისი ნაძვი და კიპარისები წაიღოს, შუქს გვითიშავენ, მანქანები არ გვაძინებენ.არა გვყავს პატრონი, ყველა გვემუქრება, პოლიცია ჩვენია, ივანიშვილი, ჩვენია, ფეხებს მოგვჭამთ თქვენო და ჩვენ ვისი ვართ? სად წავიდეთ?“- ამბობს ადგილობრივი.

ოზურგეთის საკრებულოს წევრის ბესო ქათამაძის თქმით ადგილობრივ მოსახლეობას ივანიშვილის სახელით ემუქრებიან:

„ეს ყველაფერი უკავშირდება ივანიშვილის კანონგარეშე ქმედებებს, რომელსაც შემაკავებელი არაფერი აქვს. ხალხი ყოველდღიურად საფრთხის წინაშეა. ზიანდებიან, მანქანები ეჯახებათ. მაგრამ კანონგარეშე დგას ერთი კაცი, რომლის სახელითაც ემუქრებიან.“- განაცხადა ქათამაძემ.