მთის კურორტების განვითარების კომპანიის წარმომადგენლების განცხადებით, გუდაურში 16 მარტს საბაგიროს ავარიის დროს გაწყდა ავარიის ადგილზე მყოფ თანამშრომელბთან კავშირი და 2 საათის განმავლობაში მათთან დაკავშირება ვერ ხერხდებოდა.

„კომუნიკაციის პრობლემა იყო სამწუხაროდ ორი საათის განმავლობაში. მიზეზი არ ვიცით. რადიო იმპულსიც ძალიან შეფერხებით მუშაობდა და ამას გამოძიება დაადგენს. მე პირადად რამდენიმე წუთის განმავლობაში ვიყავი ინფორმაციის ვაკუუმში იმიტომ, რომ არ ვიცოდი ზუსტად რა ხდებოდა საძელეს მიმდებარე ტერიტორიაზე,“- განაცხადა მთის კურორტების განვითარების კომპანიის დირექტორმა სანდრო ონოფრიშვილმა.

ანალოგიურ პრობლემებზე საუბრობს უწყების დირექტორის მოადგილეც.

„კომუნიკაცია ჭირდა თანამშრომლებთან ვინც იყო უშუალოდ ადგილზე, დაკავშირება ჭირდა ტელეფონით. მიზეზს ვერ ვიტყვი, რა შეიძლება ყოფილიყო, თუმცა ფაქტი იყო რომ ვინც ადგილზე იყო იმათთან დაკავშირება შეუძლებელი იყო,“-განაცხადა ირაკლი ჭირაქაძემ.