,,ეკონომიკაში ჩახედულ პიროვნებას რომ ანახოთ სტატისტიკის სამსახურის მონაცემები, აუცილებლად გეტყვით, რომ საქმე გვაქვს ეკონომიკურ რეცესიასთან. მართლაც გასული წლის ოქტომბრიდან მოყოლებული სახეზეა ეკონომიკის სისტემატური ვარდნა, რომლის ნიშნულმა(მინუს 0.8%) ივნისში საგანგაშო ზღვარს მიაღწია.

შეიძლება ითქვას, რომ ეკონომიკური კრიზისი კარზეა მომდგარი. ქართული ეკონომიკა ავადაა, რასაც აქვს თავისი მიზეზები. ესაა, წინა ხელისუფლების მემკვიდრეობა, არასახარბიელო გლობალური ეკონომიკური მდგომარეობა და ახალი ხელისუფლების არაადექვატური პოლიტიკა.

პირველ რიგში, მთავრობამ უნდა აღიაროს ეკონომიკური რეცესიის ფაქტი და შეიმუშაოს ეკონომიკის სტიმულირების შესაბამისი გეგმა, იგივე "საგზაო რუქა", რომლის მთავრი მიზანი ეკონომიკურ ზრდასთან ერთად ქვეყანაში დამკვიდრებული სოციალურ უთანასწორობის აღმოფხვრა იქნება.

სამწუხაროდ, დღეს საქართველო ლიდერი ქვეყანაა რეგიონში სიღარიბის დონის მიხედვით. არა იმიტომ რომ ქართველები ზარმაცები არიან, როგორც ზოგიერთებს სურთ წარმოაჩინონ არამედ იმიტომ რომ არსებული სისტემა არ აძლევს ყველა მოქალაქეს საშუალებას თანაბარ პირობებში აწარმოოს საკუთარი ბიზნესი, მიიღოს შესაბამისი განათლება და დასაქმდეს.

ამიტომ არის აუცილებელი დაირღვეს არასამართლიანი სისტემა, რომელიც მხოლოდ საზოგადოების მცირე ნაწილისთვის აწესებს პრივილეგიას ეკონომიკურ სიკეთეებზე, როგორიცაა ბუნებრივი რესურსები, მიწა, კაპიტალი, ფინანსები, სახელმწიფო შესყიდვები. ამ მანკიერ სისტემის განვითარებას ყველა წინა ხელისუფლებამ თავისი კვალი დაამჩნია და როგორც ვატყობ გამონაკლისი არც დღევანდელია. რადგან ჩვენ ვერ ვხედავთ ახალი ხელისუფლების ნაბიჯებს, რომლებიც ხელს შეუწყობდნენ ქვეყანაში საშუალო კლასის ჩამოყალიბებას.

მოქმედმა ხელისუფლებამ უნდა გააცნობიეროს, რომ მის მიერ შექმნილი ეკონომიკური და პოლიტიკურ სისტემა იქნება მყიფე, თუ ის არ იქნება გათვლილი ყველა მოქალაქეზე და არ უზრუნველყოფს მათ აუცილებელი სიკეთეებით. სისტემა რომელიც წარმოშობს პრივილეგიებს, ადამიანებში ანგრევს რწმენას დემოკრატიასა და საბაზრო ეკონომიკისადმი, რასაც ბუნებრივია ხელისუფლების ლეგიტიმურობის საკითხი მოყვება," - აცხადებს ედპ-ის ერთერთი ლიდერი.