მოუწევთ თუ არა მოქალაქეებს „სითი პარკის“ მიერ უკვე გამოწერილი ჯარიმების გადახდა

საზოგადოება - 12:53, 13 Mar, 2018

2941

თბილისის ვიცე-მერის, ირაკლი ხმალაძის განცხადებით, “სითი პარკთან” ხელშეკრულების გაწყვეტის გამო, მერია პირგასამტეხლოს არ გადაიხდის.

„არ გვაქვს იმის დრო, კომპანიას ვასწავლოთ, რომ მოქალაქეების წინაშე დაკისრულ ვალდებულებებს შესრულება სჭირდება. კომპანიას, რომელსაც არ ესმის, რომ ხელშეკრულების პირობების დარღვევით მოქალაქეების უფლებები ირღვევა, ჩვენ მასთან საქმე არ გვაქვს,”- განმარტა ჟურნალისტებთან ხმალაძემ და იქვე დასძინა, რომ კომპანიამ არ შეასრულა ერთადერთი პირობა, რაც საპარკინგე ინფრასტრუქტურის მოწყობას გულისხმობდა, მათ შორის საპარკინგე ზოლების დახაზვა, საპარკინგე ნიშნების დაყენება და შშმ პირებისთვის საპარკინგე სივრცის მოწყობა.

რაც შეეხება პასუხისმგებლობის საკითხს, მერიის მაღალჩინოსანმა განმარტა, რომ “სითი პარკს”, შესაძლოა, დაეკისროს გარკვეული პასუხისმგებლობა 1,5 მლნ ლარის ოდენობით.

ჟურნალისტები დაინტერესდნენ ექნება თუ არა მერიის გადაწყვეტილებას გავლენა უკვე გამოწერილ ჯარიმებზე, რაზეც ხმალაძემ თქვა, რომ უკვე გამოწერილი ჯარიმების გადახდა მოქალაქეებს მოუწევთ.

“ჯარიმების გადახდა მოუწევთ, იმათ ვისაც ის დაკისრებული ჰქონდა, თუ ეს ჯარიმა არასამართლიანად არ არის გამოწერილი, რასაც სამწუხაროდ, ხშირად ჰქონდა ადგილი ამ კომპანიის მხრიდან,”- თქვა მერის მოადგილემ.