„ვის ჯიბეში აღმოჩნდება 6 მილიონი ლარი“ - რატომ აწყობს ხელისუფლებას ტაქსებში მრიცხველის დამონტაჟება

საზოგადოება - 16:27, 12 Mar, 2018

2973

თბილისის მერიის ახალი ინიციატივით, ტაქსით მომსახურების რეგულაცია 3 ეტაპად განხორციელდება. მათ შორის სავალდებულო გახდება, ტაქსებში მრიცხველის დამონტაჟება.

მერიის ინიციატივას, სკეპტიკურად უყურებს ოპოზიცია. როგორც „ერთიანი ნაციონალური მოძრაობის“ ერთ-ერთმა ლიდერმა რომან გოცირიძემ „ნიუპოსტთან“ საუბრისას განაცხადა, ტაქსებში მრიცხევლის დამონტაჟება მომსახურების ფასების ზრდას გამოიწვევს.

„ნაციონალური მოძრაობის“ წევრი ხელისუფლების მხრიდან კონკრეტული პირის დაინტერესებას არ გამორიცხავს, რომელიც საქართველოში მრიცხველების შემოტანას უზრუნველყოფს.

“დედაქალაქში ტაქსების მდგომარეობა დანგრეულია, ფაქტობრივად ტაქსოპარკი არ არსებობს. ისეთ ვითარებაში თუ როგორ საშინლად გაძვირდა საწვავი, მძღოლებს სახლში კაპიკებიც ვერ მიაქვთ. ტექნიკური დათვალიერების, ლიცენზირების, სანებართვო მოსაკრებლების, პლუს მრიცხველების დაყენება- დაუშვებელია. არა მხოლოდ ტაქსის მძღოლებისთვისაა ეს ყველაფერი წნეხი, არამედ თვით მომხმარებლებისთვისაც გაძვირდება მომსახურება. ამიტომაა, რომ დღეს არავინ ჩივის იმას, რომ არ არის მანქანაში დაყენებული მრიცხველი. აქ ჩამოთვლილი მიზეზების გარდა, მინდა ისიც ავღნიშნო, რომ როგორც ჩანს ვიღაცას ხელისუფლებიდან უნდა მრიცხველების შემოტანა. თბილისში 60 000 ტაქსსზე, რომ 100 ლარიანი მრიცხველი შემოიტანონ ვიღაცის ჯიბეში უკვე 6 მილიონი ლარი აღმოჩნდება. თუმცა არამგონია, რომ ეს მრიცხველი 100 ლარი ღირდეს. იმ პირობებში კი, როდესაც მოსახლეობაში ეს თემა არც თუ ისე პოპულარულია ფაქტია, რომ ვიღაცას საკუთარი ინტერესი ამოძრავებს“ - განაცხადა რომან გოცირიძემ.