ირაკლი ტაბაღუამ 8 მარტი დასუფთავების სამსახურის თანამშრომლებს და რიგით გამვლელებს მიულოცა

საზოგადოება - 10:00, 08 Mar, 2018

1176

ირაკლი ტაბაღუამ ქალთა დღის დილა, დასუფთავების სამსახურში მომუშავე ქალბატონებისთვის დღესასწაულის მილოცვით დაიწყო. რუსთავის მერმა, მოადგილეებთან დავით კეკელიძესთან, ბესიკ ტოგონიძესთან, ასევე საკრებულოს დეპუტატ ამირან ჯანჯღავასთან ერთად, დილიდან ქალაქის ქუჩები მოიარა და დასუფთავების თანამშრომელ და შემხვედრ ქალბატონებს ყვავილების თაიგულები მიართვა.

ქალთა საერთაშორისო დღეს, რუსთავში მთელი დღის განმავლობაში, სხვადასხვა ღონისძიებები გაიმართება, მათ შორის, გიგა ლორთქიფანიძის სახელობის რუსთავის დრამატული თეატრის ფოიეში 14:00 საათზე, რუსთაველი ქალბატონების ხელნაკეთი ნივთების გამოფენა სახელწოდებით - „რუსთაველია და გავიცნოთ“ გაიხსნება. გამოფენაზე 12 ქალბატონის მიერ შექმნილი ხელნაკეთი დეკორატიული ნივთები, აქსესუარები და სამკაულები იქნება წარმოდგენილი.

16:00 საათზე, გიგა ლორთქიფანიძის სახელობის პროფესიულ დრამატულ თეატრში, მარჯანიშვილის თეატრის სპექტაკლი „კაცები“ გაიმართება. სპექტაკლზე დასასწრებად, რუსთავის მერიამ სხვადასხვა პროფესიის ქალბატონები მიიწვია. რამდენიმე მათგანი კი, მათ შორის ტაქსის მძღოლად მომუშავე ქალბატონები, რუსთავის მერმა პირადად დაპატიჟა თეატრში და სპექტაკლის ბილეთები გადასცა.

დღესვე რუსთაველი ქალბატონებისათვის 8 მარტთან დაკავშირებით, მუნიციპალური ტრანსპორტით მგზავრობა უფასო იქნება. ქალთა საერთაშორისო დღისადმი მიძღვნილი ღონისძიებები, ქალაქ რუსთავის მუნიციპალიტეტის მერიისა და ა(ა)იპ ,, სახელოვნებო, სპორტისა და ახალგაზრდობის განვითარების ცენტრის" ორგანიზებით ტარდება.