საქართველოს კათოლიკოს-პატრიარქის პრესმდივანის მიქაელ ბოტკოველის განცხადებით, არჩილ ტატუნაშვილის ცხედრის გადმოსვენების საკიტხში დასახმარებლად რუსეთის პატრიარქისადმი მეორედ მიმართვა არ იგეგემება.

ბოტკოველის განცხადებით, საპატრიარქო არ ფლობს ინფორმაციას ცხედრის გადმოსვენების ზუსტ დროზე და ელოდება კონკრეტულ ვადებს:

„სამწუხაროდ მხოლოდ პირველადი ინფორმაცია გვაქვს, რომ რუსეთის საპატრიარქომ მიიღო ჩვენი თხოვნა, რათა დაგვხმარებოდნენ აღნიშნული საკითხის მოგვარებაში. სხვა დამატებითი ინფორმაცია არ მიგვიღია. ჩვენც მოლოდინის რეჟიმში ვართ და ყოველწუთიერად ველოდებით შეგვატყობინონ დრო, როდის მოხდება ტატუნაშვილის გადმოსვენება”, – განაცხადა პატრიარქის პრესმდივანმა.

მამა მიქაელ ბოტკოველი ვარაუდობს, რომ არჩილ ტატუნაშვილის გადმოსვენება მიმდინარე კვირის ბოლომდე უნდა მოხდეს.

„დამეთანხმებით, რომ ხელმეორედ ასეთი თხოვნით მიმართვა არ გაკეთდება. ასეთი მაღალი დონის საქართველოს ეკლესიის მეთაური დაუკავშირდეს რუსეთის ეკლესიის მეთაურს განმეორებით, აღარ მოხდება. უნდა ჩავთვალოთ, რომ ან ვერ მოხდა რეაგირება ამ საკითხზე, ან რუსეთის საპატრიარქოს არ აქვს სათანადო ბერკეტები, რათა აღმოგვიჩინოს დახმარება”, – განაცხადა მამა მიქაელ ბოტკოველმა.