მთაწმინდაზე, ჭონქაძის ქუჩაზე, სამოქალაქო მოძრაობა „ქალაქი ჩვენიას“ წევრები სასტუმროს მშენებლობა გააპროტესტეს. შეკრებილების განცხადებით, ტერიტორიაზე მშენებლობა სახიფათოა, ვინაიდან ის სეისმურად აქტიური და მეწყერსაშიში ზონაა. გარდა ამისა, მშენებლობა გზის კიდევ უფრო მეტად გადატვირთვას გამოიწვევს.

მოძრაობის წევრები თბილისის მერს მიმართავენ, რათა დროებით მშენებლობები შეჩერდეს და მასთან პირისპირ შეხვედრას ითხოვენ.

„რამდენიმე წლის წინ ჩამოწვა მეწყერი, გაანადგურა ბენზინგასამართი სადგური და დაიხოცნენ ადამიანები. სამწუხაროდ, ამ მაგალითიდანაც ვერ გამოვიტანეთ ლოგიკური დასკვნები. ჩვენი ექსპერტების მოსაზრებებით, მიმდინარეობს საშიში მშენებლობა,“ - განაცხადა საქართველოს ტრანსპორტის და გზების ასოციაციის თავმჯდომარემ დავით მესხიშვილმა.

თბილისის მერი კახა კალაძე აქციის მონაწილეთა მოთხოვნებს გამოეხმაურა.

„ჩვენი კარი არის ყველასთვის ღია. ვისაც რაიმე შეკითხვა აქვს, პრობლემა არსებობს, მზად ვართ შეხვედრისთვის, გავიაროთ ინდივიდუალურად, კონკრეტული ქეისები, ასე რომ, პრობლემა არავის არ აქვს ჩვენთან კომუნიკაციის,“ - განაცხადა კახა კალაძემ.