ამ მიზნით, ზემო სამგორის სარწყავი სისტემის ქვემო მაგისტრალური არხის გამანაწილებელი - 6 - ის 30 მეტრიანი რკინა-ბეტონის ღარი, სატესტო რეჟიმში მინაქსოვილით არმირებული კომპოზიტური მასალით დამზადებული ღარებით შეიცვალა.

საბჭოთა კავშირის პერიოდიდან მოყოლებული დღემდე პარაბოლური ღარები რკინა-ბეტონით მზადდებოდა. აღიშნული სამუშაოები სოფლის მეურნეობის მინისტრის პირველმა მოადგილემ დავით შერვაშიძემ და საქართველოს გაერთიანებული სამელიორაციო სისტემების კომპანიის დირექტორმა ვაჟა კირტავამ დაათვალიერეს.

,,სამინისტრომ უკვე დაიწყო საირიგაციო სისტემების რეაბილიტაციის 3 წლიანი პროგრამა, რომლის მიზანია მოხდეს 180 ათას ჰექტრის გასარწყავება. ამ ახალი ტექნოლოგიის დანერგვით კი პირველ რიგში წყლის დინების რეგულაციას და ეფექტურად ხარჯვას, ასევე სამუშაოების შესრულების დროის შემცირებას შევძლებთ. აღსანიშნავია, რომ არხების ახალი მასალით რეაბილიტაცია შესაძლებელია ხელით და არ საჭიროებს მძიმე ტექნიკას და ამწე-მექანიზმებს. სარწყავი სისტემების გამართული მუშაობა ადგილობრივი პროდუქციის წარმოების ზრდას შეუწყობს ხელს, რაც მნიშვნელოვნად გააუმჯობესებს ადგილობრივი ფერმერების ეკონომიკურ მდგომარეობას", - განაცხადა დავით შერვაშიძემ.

როგორც ვაჟა კირტავამ აღნიშნა, ,,ექსპერიმენტის გამართლების შემთხვევაში კომპანია მთლიანად გადავა სარწყავ სისტემებზე ამ ტექნოლოგიით დამზადებული ღარების გამოყენებაზე. ახალი ტექნოლოგიის დანერგვა დამოკიდებულია სხვადასხვა რამეზე, კერძოდ: თუ როგორ გაუძლებს ზამთარს, კლიმატურ პირობებს და ტემპერატურის ცვალებადობას, ასევე, გარე ზემოქმედებებს, არხში წყლის გაშვების შემდეგ ადგილი ექნება თუ არა წყლის გაჟონვა-დაკარგვას".

მსგავსი საცდელი ღონისძიება იგეგმება საქართველოს სხვადასხვა რეგიონში, სხვადასხვა ტიპის ჰიდროტექნიკურ ნაგებობებში. აღსანიშნავია, რომ კომპოზიტური მასალისგან დამზადებული ღარები, რომელსაც კომპანია დადებითი შეფასების შემთხვევაში სამომავლოდ სარწყავი სისტემების ინფრასტუქტურის მოსაწესრიგებლად გამოიყენებს, წარმოებულია საქართველოში. იგი უფრო იაფი და მსუბუქია.