,,დათო პანკისკის" მკვლელობა - შაქრო კალაშოვის კვალი ტარიელ ონიანის გარემოცვის წევრის მკვლელობის საქმეში

საზოგადოება - 13:05, 28 Feb, 2018

5153

თურქეთის პოლიციამ ე.წ კანონიერი ქურდის, დავით ალხანაშვილის, იგივე „დათო პანკისკის“ მკვლელობა გახსნა. ინფორმაციას ამის შესახებ life.ru ავრცელებს. ალხანაშვილი 2017 წლის 22 დეკემბერს სტამბოლში ჩაცხრილეს. გამოძიების ინფორმაციით, ალხანაშვილის მკვლელობა შესაძლოა, ე.წ კანონიერი ქურდის, ანდრანიკ სოგოიანის მიერ იყოს ორგანიზებული, რომელიც შაქრო კალაშოვთან დაახლოებული პირია.

როგორც წყარო რუსეთის შსს-დან life.ru-ს უყვება, შაქრო კალაშოვმა ანდრანიკ სოგოიანს უბრძანა, სტამბოლში რამდენიმე ქილერთან ერთად ჩასულიყო. სოგოიანი უთვალთვალებდა ალხანაშვილს და იმისთვის, რომ ქუჩაში გამოეყვანა, დათო პანკისკის დაურეკა და შეხვედრა შესთავაზა. „დათო პანკისკი“ ბოსფორის სანაპიროზე მდებარე რესტორნიდან გამოვიდა და სოგოიანთან შესახვედრად რამდენიმე ასეული მეტრი სანაპიროზე ფეხით გაიარა, სწორედ ამ დროს მისი მისამართით პისტოლეტიდან რამდენიმეჯერ ისროლეს.

სტამბოლის კრიმინალური პოლიცია ვარაუდობს, რომ მსროლელი ქილერი იყო, რომელიც სოგოიანმა რუსეთიდან ჩამოიყვანა. ალხანაშვილის მკვლელობის დღესვე სოგოიანმა და მისმა ხელქვეითებმა თურქეთი დატოვეს და მიმალვაში არიან.

არსებული ინფორმაციით, 36 წლის ქართველი ე.წ კრიმინალური ავტორიტეტის მკვლელობა, რომელიც ტარიელ ონიანის და ნადირ სალიფოვის გარემოცვის წევრად ითვლებოდა, დაკავშირებულია რუსეთის კრიმინალურ სამყაროზე კონტროლის მოსაპოვებლად კლანების ბრძოლასთან.