„მაინც გაიგებს ხალხი სიმართლეს!!!“ - ხორავას ქუჩის მკვლელობის საქმეზე ზვიად კუპრავას ინფორმაციის გაუთქმელობაზე ხელი მოაწერინეს

საზოგადოება - 20:17, 21 Feb, 2018

2180

ხორავას ქუჩაზე მომხდარი არასრულწლოვნების მკვლელობის საქმეზე დღეს თბილისის მთავარ სამმართველოში დაკითხვაზე იყო დაბარებული ყოფილი სამართალდამცავი, „რეფორმების ცენტრის“ დირექტორი ზვიად კუპრავა. საქმე ეხებოდა ფარულ ჩანაწერს, სადაც საუბარია ინციდენტში მონაწილე ერთერთი პირის ბაბუაზე, რომელიც, გავრცელებული ჩანაწერის მიხედვით, მისი შვილიშვილის იქ ყოფნის დაფარვას გაკრვეული თანხის სანაცვლოდ ითხოვდა.

მოწმეთა მოქრთამვის შესაძლო ფაქტზე ზვიად კუპრავა გამოძიებას ითხოვდა. მან ამის შესახებ განცხადება პროკურატურაში რამდენიმე დღის წინ თავად შეიტანა.

დაკითხვის დასრულების შემდეგ ზვიად კუპრავა აცხადებს, რომ მას ხელი მოაწერინეს ინფორმაციის გაუთქმელობაზე.

„საგამოძიებო ორგანოში ხელი მომაწერინეს ყველა იმ ინფორმაციის გაუთქმელობაზე, რომელსაც მე ვფლობ ხორავას ქუჩაზე მომხდარი ტრაგედიის შესახებ.

აქამდე, მე ვიყავი ერთ-ერთი წყარო საზოგადოებისთვის, თუ ერთადერთი არა, ვისგანაც ხალხი გებულობდა ფაქტებს, რომელსაც პროკურატურა საგულდაგულოდ მალავდა და მალავს.

დღეს მე ამაში კანონით, და უკანონოდ შემზღუდეს!

თუ ვინმეს აქვს ეჭვი, რომ ჩემი გაჩერება რამეთი არის შესაძლებელი, ძალიან ცდება!

პ.ს. მაინც გაიგებს ხალხი სიმართლეს!!!

პპ.ს. ველოდები როდის მომიგზავნით ახალ გიჟს..!“ - წერს ზვიად კუპრავა