,,პრაქტიკული ჟურნალისტიკის“ სკოლა დამწყები ჟურნალისტებისთვის პრეზიდენტის სარეზერვო ფონდის დაფინანსებით

საზოგადოება - 15:30, 20 Feb, 2018

2392

საქართველოს პრეზიდენტის სარეზერვო ფონდის დაფინანსებით საინფორმაციო სააგენტო ,,ნიუპოსტი“ სააგენტო ,,პირველ რადიოსთან“ ერთად ახორციელებს პროექტს ,,პრაქტიკული ჟურნალისტიკა“ დამწყები ჟურნალისტებისთვის.

პროექტის ფარგლებში უკვე გაიმართა ორი ტრენინგკურსი. სწავლებაში მონაწილეობას იღებს 10 სტუდენტი ჟურნალისტიკის ფაკულტეტიდან და მათ პრაქტიკულ და თეორიულ სწავლებას უტარებენ პროფესიონალი ჟურნალისტები და სხვადასხვა სფეროს ექსპერტები.

ქართული მედიის ერთ-ერთი მთავარი პრობლემა პრაქტიკული ჟურნალისტიკაა, რაც პროფესიონალ ჟურნალისტად ჩამოყალიბების აუცილებელი პირობაა. პრაქტიკული ჟურნალისტიკის სკოლის მიზანია, ჟურნალისტიკის ფაკულტეტის სტუდენტებს გაუღრმავოს ცოდნა ჟურნალისტიკის ყველა მიმართულებაში და გაიარონ პრაქტიკული კურსი. პროექტის ფარგლებში შერჩეული 10 სტუდენტი გაივლის პრაქტიკულ და თეორიულ სწავლებას 10 თვის განმავლობაში. დამწყები ჟურნალისტები, თეორიული ცოდნასთან ერთად, მიიღებენ ფართო პრაქტიკულ გამოცდილებას, შესაძლებლობა ექნებათ დაესწრონ პრესკონფერენციებს, მოამზადონ ნიუსი/რეპორტაჟი, მოამზადონ კომენტარები რესპოდენტებთან. ყოველივე ეს კი ხელს შეუწყობს ჟურნალისტური უნარ-ჩვევების ჩამოყალიბებას, მიმდინარე მოვლენების სწორ ანალიზს, შეისწავლიან ნიუსმარკეტინგს და უნივერსიტეტის დასრულების შემდეგ, მათ ექნებათ პრაქტიკული გამოცდილება, რომელიც ერთერთი მნიშვნელოვანი ფაქტორია მედიასაშუალებებში დასაქმების თვალსაზრისით.