გახშირებული ქურდობები ოზურგეთში - ლიხაურში რამდენიმე საცხოვრებელი სახლი გაქურდეს

კრიმინალი - 01:16, 13 Feb, 2018

1504

ოზურგეთში ბოლო დღეების განმავლობაში რამდენიმე სახლი და მაღაზია გაიქურდა.

როგორც ჩვენთვის ხდება ცნობილი, სოფელ ლიხაურში რამდენიმე საცხოვრებელი სახლი გაქურდეს.

ჩვენი წყაროს ცნობით, სახლებიდან ძირითადად გააქვთ საკვები პროდუქტები და საყოფაცხოვრებო ნივთები. ერთ-ერთი სახლიდან კი წაღებული იყო სანადირო თოფი.

მომხდარზე პოლიციამ არასრულწლოვანი დაკითხა, რომელმაც აღიარა ჩადენილი დანაშაული და მოპარული ნივთი უკან დააბრუნა.

ჩვენთვის ასევე ცნობილი ხდება, რომ გახშირებულ ქურდობებთან დაკავშირებით რამდენიმე ახალგაზრდა პოლიციაში დაკითხვაზეც იმყოფებოდა.

გარდა ლიხაურისა, ბოლო დღეებში სასურსათო მაღაზია გაიქურდა სოფელ ჭანიეთში და ნატანებში. გუშინ გვიან ღამით კი, სოფელ შემოქმედში მაღაზიაში გამოძიებისთვის ჯერ ჯერობით დაუდგენელმა პირებმა ხელყუმბარა შეაგდეს.

ჰყავს თუ არა სამართალდამცველებს ეჭვმიტანილები და რისთვის დაიკითხა რამდენიმე ახალგაზრდა შსს-ს პრესსამსახურში აცხადებენ, რომ ოზურგეთის რაიონული სამმართველოს თანამშრომლებმა ქურდობის ფაქტზე არასრულწლოვანი ამხილეს, რომელმაც საცხოვრებელი სახლის დამხმარე სათავსოდან საყოფაცხოვრებო ნივთები და სანადირო თოფი მოიპარა, რის შემდეგაც შემთხვევის ადგილიდან მიიმალა.