ოზურგეთის მუნიციპალიტეტის სოფელ შრომის საჯარო სკოლაში მოსწავლის ცემაში ბრალდებული მასწავლებელი, კომენტარს აკეთებს. მისი თქმით, მოზარდი თანატოლებმა დაასმინეს და ამიტომაც "შემოარტყა ხელი", შემდეგ კი ბოდიში მოუხადა.

"ღონისძიება გვქონდა, იქ რაღაც მოხდა. ბავშვებმა ჩამასმინეს, რომ ეს გიორგის გაკეთებული იყო. მეორე დღეს დერეფანში შევხვდი და ერთი კი შემოვარტყი ხელი, შვილო გიორგი ეს რატომ ჰქენი?! მერე გავარკვიე რომ საერთოდ არაფერ შუაში არ ყოფილა ეს ბავშვი. ბოდიში მოვუხადე გიორგისაც და მშობლებსაც. გულწრფელად ვინანე, რაც გავაკეთე. მეგონა ეს პრობლემა ამოწურული იყო ამით და ერთი კვირის შემდეგ რა მოხდა ვერ ვხვდები. 37 წელია პედაგოგი ვარ და მსგავსი რამ არასდროს მომსვლია, ამას ვერავინ ვერ დამაბრალებს. 63 წლის ქალს თუ ახლა ამის გამო დამაპატიმრებენ და რას ვიზამ?" - ამბობს მასწავლებელი.

სკოლის დირექტორის თქმით, საქმე შესასწავლად გადაცემული აქვს დისციპლინურ კომიტეტს.

შემთხვევა სკოლაში პირველ თებერვალს მოხდა. მეშვიდეკლასელ ბიჭს, როგორც პედაგოგი ჰყვება, ჯერ სიტყვიერი და მერე ფიზიკური შეურაცხყოფა იმის გამო მიაყენა, რომ მოსწავლეებმა ის მასთან დაასმინეს.

ნაცემი მოსწავლის მშობლები კი, კომენტარს არ აკეთებენ და აცხადებენ, რომ მსგავსი რამ საერთოდ არ მომხდარა.