გამომძიებლებმა მოკლულის დეიდა გამოკითხეს, ვისთანაც გარდაცვლილი უკანსკნელი ერთი წლის განმავლობაში ცხოვრობდა. გარდაცვლილი დეიდა აცხადებს, რომ მან არ იცის თუ რის გამო შეიძლება მოეკლათ დავით ქმოსტელი და იგი არ იყო დაახლოებული კრიმინალური ავტორიტეტის მქონე პირებთან.
შს მინისტრის მოადგილე ნათია მეზვრიშვილი აღნიშნავს, რომ საქმეზე ოპერატიული საგამოძიებო ღონისძიებები მიმდინარეობს.
„გამოძიება ლომთათიძის ქუჩაზე მომხდარ მკვლელობასთან დაკავშირებით დაწყებულია სისხლის სამართლის კოდექსის 108-ე და 236-ე მუხლებით, ინტენსიურად ვატარებთ საგამოძიებო მოქმედებებს და ოპერატიულ სამძებრო ოპერაციებს, როგორც კი დანაშაულის ცამდენი პირის იდენტიფიცირება და დაკავება მოხდება, საზოგადოებას დაუყოვნებლივ შევატყობინებთ“, - განაცხადა შინაგან საქმეთა მინისტრის მოადგილემ ნათია მეზვრიშვილმა.
სამართალდამცავებმა მოკლულის ის მეგობარიც დაკითხეს, ვისთან ერთადაც მკვლელობამდე ცოტა ხნით ადრე იმყოფებოდა. მეზობლების განცხადებით, ნიღბიანმა პირებმა ქმოსტელი სახლის ეზოში ჩაცხრილეს და ამის შემდეგ ადგილიდან მიიმალნენ.
„კარგი ტიპი იყო, არავისთან დაპირისპირება არ ჰქონია, მოდიოდა ხოლმე აქ საძმაკაცოსთან, ხუთი გასროლის ხმა გავიგე, ნიღბიანები ნამდვილად იყვნენ თავდამსხმელები. გამოძიებამ საკმაოდ ბევრი თვითმხილველი დაკითხვა. ამ ქუჩაზე არ ცხოვრობდა, თუმცა ხშირად მოდიოდა ხოლმე აქ“, - აღნიშნავენ ლომთათიძის ქუჩის მაცხოვრებლები.
მოკლული საქართველოში რუსეთიდან დაახლოებით ერთი წლის წინ ჩამოვიდა.
მასალის გამოყენების პირობები