საქართველოს მკლავჭიდელთა პირველი შეჯიბრება 1989 წელს თბილისის სახელმწიფო უნივერსიტეტში გაიმართა. ამ საქმის თაოსანი იყო ვახტანგ მუსელიანი, რომელმაც შემდგომ ჩამოაყალიბა საქართველოს ნაკრები და მკლავჭიდის ფედერცია.

ჩვენი მიღწევები ამ დარგში იძლევა ყველა შესაძლებლობას რომ ეს სპორტი ჩვენთანაც ისევე როგორც რიგ ქვეყნებში ძალიან პოპულარული იყოს. ჩვენი ბიჭები მსოფლიო ჩემპიონები ისე ხდებოდნენ და ხდებიან კიდეც, რომ მაღალი სტანდარტების სპორტული დარბაზები არ აქვთ.

დღეს ვისაუბრებთ გლდანში მდებარე მკლავჭიდის სავარჯიშო დარბაზზე სადაც ვარჯიშის შედეგად ამ სპორტის არაერთმა წარმომადგენელმა მრავალგზის ასახელა ჩვენი ქვეყანა.

მათ შორის არიან მსოფლიოსა და ევროპის არაერთგზის ჩემპიონები ივანე კბილაშვილი, ნიკოლოზ წერეთელი და ალექსი ფრეწუაშვილი. როგორც ბიჭები აღნიშნავენ გლდანში მდებარე დარბაზი აღჭურვილია ყველა საჭირო ინვენტარით, რაც იძლევა სრულ შესაძლებლობას ამ სპორტის მიმდევრებმა ივარჯიშონ სათანადო პირობებში და მოახდინონ შესაძლებლობების მაქსიმალური დემონსტრირება.

ასევე, აღსანიშნავია პროფესიონალი მწვრთნელები რომელებიც ამ დარბაზში მოღვაწეობენ და ძალას არ იშურებენ საკუთარი ცოდნა და გამოცდილება გაუზიარონ ამ სპორტით დაინტერესებულ ახალგაზრდებს.

ერთ-ერთი ასეთი მწვრთნელი მოქმედი სპორტსმენი 2004 წლის მსოფლიოს ვიცე-ჩემპიონი დავით ყაზახაშვილია , რომელიც 2012 წლიდან წვრთნის ზემოთაღნიშნულ სპორტსმენებს და რომელსაც მკლავჭიდელთა განმარტებით ლომის წილი მიუძღვის მათ წარმატებაში .

როგორც ბატონი დავითი აღნიშნავს მკლავჭიდი ფიზიკურთან ერთად დაძაბული ფსიქოლოგიური ბრძოლაც არის, ამიტომ გამარჯვებისთვის საჭიროა, სრულყოფილად ფლობდე სპორტის ამ სახეობის ტაქტიკურ და ტექნიკურ ილეთებს. ყველა ჩემპიონს საკუთარი ტექნიკა და ტაქტიკა აქვს. სპორტის ეს სახეობა თავისი არსით საერთაშორისო და კოსმოპოლიტურია, რამდენადაც მასში ჩადებულია უზარმაზარი ბიოლოგიური აზრი – მკლავჭიდი ყველა მამაკაცს აძლევს საშუალებას, უმარტივესი გზით გამოავლინოს თავისი ძალა და ამით ზიანი არავის მიაყენოს.