თბილისის გენგეგმაზე მომუშავე ჯგუფის, „სითი ინსტიტუტ საქართველოს“ თანახელმძღვანელი მერაბ ბოლქვაძე:

როდესაც „ჯინო გრინ სითიმ“ პროექტის პირველადი ვარიანტი წარმოადგინა, ჩვენ გვქონდა გარკვეული შენიშვნები, რომელიც საინვესტიციო ჯგუფს მივაწოდეთ. ჩვენი ცალსახა რეკომენდაცია იყო, განაშენიანების ზონა ზღვიდან მოშორებით ყოფილიყო და გადანაწილებულიყო საავტომობილო გზის ზედა მხარეს და, როგორც ვიცით, მიწოდებული შენიშვნების გასწორება, განხორციელდა დანიური კომპანია „რამბოლის“ მიერ. ზოგადად კარგია და მოსაწონია, როცა ასეთი მნიშვნელოვან პროექტის (მწვანე, ეკო, ინოვაცია, სმარტი) მომზადებაში ავტორიტეტული, მსხვილი, მსოფლიო დონის აღიარებული პროფესიონალები ერთვებიან. „მწვანე კოპენჰაგენის“ პროექტის ავტორმა „რამბოლმა“ სწორედ აღიქვა ჩვენი ჯგუფის სურვილები და პროექტშიც გაითვალისწინა.

- როგორც ცნობილია, ზღვის განაშენიანების იდეა ჯერ კიდევ გასული საუკუნის 70-იან წლებში არსებობდა და უკვე პროექტიც იყო მზად, თუმცა მისი განხორციელება ვერ მოესწრო. რამდენად იზიარებთ თვითონ განაშენიანების იდეას?

რა თქმა უნდა, მახსოვს ეს პროექტი, გარდა ამისა, არსებობდა კონკრეტული დავალება თბილისის წყლის მიმართ წყალდაცვითი პროექტის შესამუშევებლად. სამწუხაროდ, ის დღემდე არ არსებობს. თუკი ასეთ პროექტს რომელიმე კომპანია ხელს მოკიდებს, თბილისის ზღვის ტერიტორიას ექნება განაშენიანების კონკრეტული კონტურები.

- თვითონ ეკოქალაქი თავის კონცეპციით რამდენად მოგწონთ?

პროექტი საინტერესოა, და ეს არაერთხელ აღმინიშნავს. შენიშვნები, რომელიც ჩვენ გავეცით, შეეხო ქალაქგეგმარებით და არქიტექტურულ ნაწილს. სწორედ ამ მიმართულებით განხორციელდა კიდეც პროექტში ცვლილებები. „ჯინო გრინ სითი კორპორაციას“ ქალაქის განახლების იდეა აქვს: ელექტრო-ტრანსპორტი, ეკოგარემო, მწვანე ენერგიები, დიდი მწვანე პარკის გაშენება ზღვის გარშემო. ეკო-სმარტ-ქალაქი - შეუძლებელია, ასეთი იდეა დაიწუნო. პირიქით, მისასალმებელია, როდესაც კერძო ინვესტორი დაკავებულია საქალაქო სარეკრეაციო სივრცეების მოწყობით - ამას არაფერი სჯობს. თბილისს და თბილისელებს ეს უნდა უხაროდეთ. ეკო სმარტ სითის აქვს შანსი, რეგიონის სავიზიტო ბარათი გახდეს.