პაატა პავლიაშვილის საქმე - ნუცუბიძეზე დაკავებისას გარდაცვლილის ოჯახი გენერალურ ინსპექციას გამოძიების დაწყების მოთხოვნით დღეს მიმართავს. პავლიაშვილის ოჯახი ითხოვს, დადგინდეს, რატომ არ ჩართეს სამართალდამცველებმა სამხრე კამერა და ფიქსირდება თუ არა სამსახურეობრივი გადაცდომა. ისინი დარწმუნებული არიან, რომ 25 ოქტომბერს პოლიციამ კანონი დაარღვია.

“იმან, რომ პროკურატურამ შეწყვიტა საქმე, არ უნდა მოახდინოს გავლენა გენერალურ ინსპექციაზე, იმიტომ, რომ ეს ორი უწყება აბსოლუტურად სხვა მიმართულებით ამოწმებს თავიანთ სფეროში საქმიანობას. ამიტომ, გვაქვს მოლოდინი, რომ გენინსპექცია საბოლოოდ დადებს დასკვნას. უფრო მეტიც, გენინსპექციამ პრაქტიკულად უპრეცედენტო გადაწყვეტილება შეიძლება მიიღოს, როდესაც იმსჯელებს ვიდეო კამერებზე - უნდა ჰქონოდათ თუ არა ჩართული და რატომ არ ჰქონდათ აღნიშნულ შემთხვევებში საპატრულო პოლიციის თანამშრომლებს,“ - განაცხადა "საიას" იურისტმა ლევან ვეფხვაძემ.