ჩატაევი შესაძლოა, პანკისში აღარ დაკრძალონ

საზოგადოება - 12:33, 19 Jan, 2018

3011

ბერი გაბრიელ სალოსის გამზირზე ჩატარებული სპეცოპერაციის დროს ლიკვიდირებული პირების ცხედრები ამ დრომდე ექსპერტიზის ეროვნულ ბიუროშია.

როგორც ირკვევა, პანკისის ხეობის მცხოვრებლები ახმედ ჩატაევის ცხედრის გადაცემის მოთხოვნას აღარ აპირებენ.

უხუცესები აცხადებენ, რომ ბოლო დროს განვითარებული მოვლენებიდან გამომდინარე სურვილი არ აქვთ, ჩატაევისა და მისი დაჯგუფების წევრები ხეობაში დაკრძალონ.

ჩატაევისა და მისი დაჯგუფების წევრების ლიკვიდაციის შემდეგ, ჩეჩნური დიასპორის წარმომადგენელმა მექა ხანგოშვილმა, ხეობის სახელით, თავდაპირველად ცხედრების გადაცემა მოითხოვა.

მაშინ ხანგოშვილი აღნიშნავდა, რომ უხუცესები არ იზიარებენ ცალხელა ახმედისა და მისი ჯგუფის ტერორისტულ იდეებს, თუმცა იმ შემთხვევაში, თუკი სახელმწიფო გადაწყვეტდა ჩატაევის ნათესავებს ცხედრის ფრაგმენტები გადაეცა, მას დუისის სასაფლაოზე დაკრძალავდნენ.

საერთაშორისო ტერორისტის ერთ-ერთი მეუღლე სწორედ სოფელ დუისიდანაა და წლების განმავლობაში შვილთან ერთად სწორედ იქ ცხოვრობდა.

„ნიუპოსტი“ ხანგოშვილთან დაკავშირებას შეეცადა, თუმცა მას ტელეფონი გამორთული აქვს. ადგილობრივი ჟურნალისტი ჩვენთან საუბრისას ამბობს, რომ ჩატაევის პანკსის ხეობაში დაკრძალვა ერთი ადამიანის სურვილი იყო და ამაზე კოლექტიური შეთანხმება არ ყოფილა.

სულხან ბორძიკაშვილმა არ იცის, იგივე აზრზეა თუ არა ხანგოშვილი.