სურსათის უვნებლობის დეპარტამენტის უფროსი გიორგი მიქაძე საბავშვო ბაღებში რძის ღვინის შეფუთვით შეტანის ფაქტზე განმარტებას აკეთებს. მისი თქმით, შეფუთვა განკუთვნილი იყო ღვინის ჩამოსასხმელად, თუმცა, შესაძლებელია გამოყენებული იყოს რძისთვისაც:

„ცხელი ხაზით იყო შემოსული სურსათის ეროვნულ სააგენტოში აღნიშნული შემთხვევის შესახებ. სააგენტოს მიერ განხორციელდა საბავშვო ბაგა-ბაღების შემოწმება. კერძოდ, 4 ბაგა-ბაღი შემოწმდა. ასევე, იმ კომპანიის არაგეგმური ინსპექტირება განხორციელდა, საიდანაც ეს რძე იყო წამოღებული. აღნიშნული შეფუთვა განკუთვნილი იყო ღვინის ჩამოსასხმელად, თუმცა ეს სურსათთან დაშვებულია, სურსათთან უშუალო შეხებაშია, ამის დამადასტურებელი დოკუმენტაცია ჩვენ უახლოეს მომავალში გვექნება. ჩვენ მიერ შემოწმების შედეგად, შეფუთვის კუთხით დარღვევა არ აღმოჩენილა. შესაძლოა მწარმოებელს არ ჰქონოდა იმ წუთში იმ შეფუთვის მარაგი, რომელსაც უშუალოდ იყენებს და ჰქონდა სხვა მარაგი, რომელიც ამ შემთხვევაში გამოიყენა.

ეტიკეტის ნაწილში დარღვევა არ დაფიქსირებულა ჩვენი შემოწმების შედეგად. ჩვენს მიერ ამ შემთხვევაში არანაირი სანქცია არაა გამოყენებული, რადგან აქ არ გვაქვს ის სამართალდარღვევა, რომლის გამოც შესაძლებელია მივიღოთ რაიმე სანქცია. არაგეგმური ინსპექტირების დროს მიცემული მითითებები თუ არ შესრულდება, ამ შემთხვევაში შეიძლება გამოვიყენოთ სანქცია“, - განაცხადა მიქაძემ.