ოზურგეთის მუნიციპალიტეტის სოფელ ჭანიეთში ქურდობამ იმატა, - ამის შესახებ „ნიუპოსტს“ რამდენიმე ადგილობრივმა აცნობა.

როგორც ისინი ჩვენთან საუბრისას აცხადებენ, სოფელში ბოლო დღეებში ორი საცხოვრებელი სახლი გაქურდეს, საიდანაც საყოფაცხოვრებო ნივთები წაიღეს. ორივე სახლი გვარად ლომჯარიებს ეკუთვნით, ერთი მათგანის, ბ.ლომჯარიას ოჯახი დედაქალაქში ცხოვრობს და ოზურგეთში მხოლოდ ზაფხულობით ჩადის. მეორე ს.ლომჯარიას სახლი კი დაკეტილია.

„ძირითადად დაკეტილ სახლებს ქურდავენ, გააქვთ ყველაფერი - ლეიბები, საბნები, ქვაბები, რისი წაღებაც კი შესაძლებელია. ალბათ, ყიდიან მერე,“ - ამნბობს ქალბატონი, რომელიც ვინაობის გამხელისგან თავს იმ მოტივით იკავებს, რომ მიუხედავად სოფელში მომხდარი არაერთი ქურდობისა, მისი გახმაურება არ სურთ.

„არაერთი ფაქტია ქათმის, ხბოს, ღორის მოპარვის, მაგრამ ხმას არავინ იღებს. ალბათ, მხოლოდ უბნის რწმუნებულს ეუბნებიან და ელოდებიან, როდის მოეღება ამას ბოლო. გასულ წელს რკინის საწოლებზე იყო მაღალი მოთხოვნა. თუ კი რომელიმე სახლში რკინის საწოლი იდგა და პატრონს სადმე გასულს დაიგულებდნენ, იპარავდნენ და ალბათ, ჯართში აბარებდნენ. ახლა შინაური ფრინველებისა და ცხოველების ქურდობას მიჰყვეს ხელი. მოშივდა ხალხს და თუ ვინმესთან რამეს დაიგულებენ, სტაცებენ ხელს,“ - ამნბობს ქალბატონი.

გახშირებული ქურდობის ფაქტებზე გამგებლის წარმომადგენელს ჭანიეთში ირაკლი რამიშვილს დავუკავშირდით.

რამიშვილი გვპასუხობს, რომ მისთვის კონკრეტული ქურდობის ფაქტზე არავის მიუმართავს: "ჩემთან არავინ მოსულა და არ უთქვამს, რამე მოპარესო, უბნის რწმუნებული გვყავს და ალბათ, იმასთან გაარკვევდნენ".