არსებული ინფორმაციით, პოლიციამ დაკითხვაზე გადაიყვანა მიმდებარე ტერიტორიაზე მეორადი ტანსაცმლის მაღაზიის მეპატრონე, რომელმაც დაინახა, თუ როგორ შედიოდა სამსონ ქუთათელაძე ამ ეტაპზე დაუდგენელ პირთან ერთად სიკვდილამდე რამდენიმე წუთით ადრე საკუთარ ოფისში.
სხვა დეტალებზე ბაზრის თანამშრომლები არ საუბრობენ, რადგან მათ მედიასთან კონტაქტი ადგილზე მისულმა პოლიციამ აუკრძალა.
როგორც ირკვევა, შემთხვევია ადგილზე ვიდეო-სათვალთვალო კამერები არაა, ფიქსირდება ერთადერთი კამერა, მაგრამ როგორც მოვაჭრეები „ნიუპოსტს“ უყვებიან, კამერა არ მუშაობს.
„გუშინვე დაგვკითხეს, თუმცა ჩემს გამოკითხვას რა აზრი აქვს, რადგან არაფერი დამინახავს. ყველა გაკვირვებულია, ძალიან კარგი ადამიანი იყო“- აღნიშნავს ბაზრის თანამშრომელი.
როგორ ირკვევა, ქუთათელაძე რუსთავის ბაზრის წილის გასხვისებას გეგმავდა, თუმცა უკავშირდება თუ არა შეკვეთიული მკვლელობა ქუთათელაძის გადაწყვეტილებას, უცნობია.
ე.წ. სტამბოლის ბაზრის მენეჯერი მეწილეებსა და ქუთათელაძეს შორის რაიმე სახის დაპირისპირებას გამორიცხავს.
„არანაირი დაპირისპირება არ ყოფილა, არ მაქვს ინფორმაცია, გეგმავდა თუ არა ქუთათელაძე წილის გასხვისებას. არც ვერსიაზე შემიძლია საუბარი. პირადად მე, არ დავკითხულვარ, თუმცა თანამშრომლები რომ დაკითხეს, ვიცი“- აღნიშნავს მენეჯერი.
რუსთავში, ე.წ. სტამბოლის ბაზრობის ტერიტორიაზე ყოფილი დეპუტატის, გენერალ სამსონ ქუთათელაძის კაბინეტი, სადაც ის მოკლული იპოვეს, დალუქულია.
ქუთათელაძის ცხედარი გუშინ დაცვის თანამშრომელმა ნახა.
მომხდარზე გამოძიება ორი მუხლით მიმდინარეობს – 236-ე და 108-ე მუხლებით, რაც განზრახ მკვლელობას და იარაღის მართლსაწინააღმდეგო მიზნით შეძენა-შენახვა-ტარებას გულისხმობს.
წინასწარი ინფორმაციით, ქუთათელაძეს ცეცხლნასროლი ჭრილობა თავის არეში აქვს მიყენებული. ბაზრის მოვაჭრეები ამბობენ, რომ გასროლის ხმა არ გაუგიათ და მკვლელობა სავარაუდოდ მაყუჩიანი პისტოლეტით არის ჩადენილი.
სამსონ ქუთათელაძე 2001 წლიდან იყო ეროვნული გვარდიის შემადგენლობაში. 2004-2006 წლებში ეროვნული გვარდიის სარდალი. 2008 წლიდან კი საქართველოს პარლამენტის წევრი, თავდაცვის და უშიშროების კომიტეტის თავმჯდომარის მოადგილე. პარლამენტში არჩეული იყო როგორც საჩხერის მუნიციპალიტეტის მაჟორიტარი დეპუტატი “ერთიანი ნაციონალური მოძრაობიდან”.
მასალის გამოყენების პირობები