თემირლან მაჩალიკაშვილის ბიოლოგიური სიკვდილი დრეს დილის 08:00 საათზე დაფიქსირდა - ამის შესახებ ჟურნალისტებთან საუბრისას წმინდა მიქაელ მთავარანგელოზის სახელობის მრავალპროფილიანი კლინიკური საავადმყოფოს კლინიკურმა მენეჯერმა, ზაზა ლურსმანაშვილმა განაცხადა.

ექიმის განცხადებით, მდგომარეობა გამთენიისას გაუარესდა:

”პირველ რიგში, მინდა მივუსამძიმრო თემირლან მაჩალიკაშვილის ოჯახის წევრებსა და ყველა მის ახლობლებს ჩვენი კლინიკის სახელით და ღრმა მწუხარება გამოვხატო. რაც შეეხება გუშინ და დღეს დილით განვითარებულ მოვლენებს, გუშინ შუადღის შემდეგ გამოიხატა მდგომარეობის საკმაოდ მკვეთრი გაუარესება. უფრო მოგვიანებით, უკვე გამთენიისას, გულის გაჩერება დაფიქსირდა. ეს იყო სამი ეპიზოდი. სამივეჯერ სარეანიმაციო ღონისძიებებით მოხერხდა გულის მუშაობის აღდგენა, თუმცა მეოთხედ, მიუხედავად ძალიან აქტიური მცდელობისა, გულის მუშაობის აღდგენა ვერ მოხერხდა და დილით, დაახლოებით 08:00 საათზე ბიოლოგიური სიკვდილი დაფიქსირდა”, - განაცხადა ზაზა ლურსმანაშვილმა.

პანკისში სეპეცოპერაციისას დაჭრილი 19 წლის თემირლან მაჩალიკაშვილის ცხედარი სამხარაულის ექსპერტიზის ბიუროშია გადასვენებული.