მსოფლიო ფეხბურთის ვარსკვლავი ზლატან იბრაჰიმოვიჩი, შვედურ მედიას ფარულ რასიზმში ადანაშაულებს. იბრაჰიმოვიჩის თქმით, მას მინიმალურ შეცდომებსაც არ პატიობენ, გვარად ანდერსონი ან სვენსონი რომ ყოფილიყო, შესაძლოა ყაჩაღობაც ეპატიებინათ. როგორც ის აცხადებს, მსგავსი წინააღმდეგობების დაძლევა მას უფრო აძლიერებს.

„რას აკეთებს შვედური მედია? თავს მესხმიან თუ მიცავენ? არა, ისინი ისევ თავს მესხმიან, იმიტომ რომ ვერ ეგუებიან იმას, რომ იბრაჰიმოვიჩი ვარ. სხვა მოთამაშე რომ იგივე შეცდომებს უშვებდეს, ჩემგან განსხვავებით მას დაიცავდნენ, მე არა. მაგრამ ეს ჩემზე კარგად მოქმედებს და უფრო ძლიერს მხდის. მე რასიზმზე ვლაპარაკობ, არ ვამბობ რომ ეს აშკარა რასიზმია, მაგრამ ლატენტური რასიზმი არის, იმიტომ რOმ მე არ ვარ გვარად ანდერსონი ან სვენსონი. ასე რომ ყოფილიყო ისინი მე დამიცავდნენ იმ შემთხვევაშიც კი, ბანკები რომ დამეყაჩაღებინა. ახლა კი არ მაფასებენ ისე, როგორც შემეფერება. მე ხომ საუკეთესო ფეხბურთელი ვარ შვედეთის ისტორიაში. არავის გაუკეთებია ის, რაც მე შევძელი. რამდენჯერ დასახელებულა ერთი და იგივე პიროვნება წლის ფეხბურთელად?! მხოლოდ ორჯერ, მე კი თერთმეტჯერ დამასახელეს! ყველაზე მეტი მე გავაკეთე შვედური ფეხბურთისთვის. მე საუკეთესო ვარ! “- განაცხადა იბრაჰიმოვიჩმა.

შვედეთის ეროვნული ნაკრების ყველა დროის საუკეთესო ბომბარდირი და ისტორიაში ყველაზე წარმატებული ფეხბურთელი 30 ტიტულის მფლობელია. შვედეთის ერთ-ერთი ყველაზე ცნობადი სახე ეთნიკურად შვედი არაა- ის ბოსნიელი მუსლიმი მამისა და ხორვატი კათოლიკე დედის შვილია.

მსოფლიოს ერთ-ერთი საუკეთესო ბომბარდირი "აიაქსის", "იუვენტუსის", "ინტერის", "ბარსელონას", "მილანისა" და "პსჟ"-ს ღირსებას იცავდა, ამჟამად ის "მანჩესტერ იუნაიტედის" რიგებშია. ზლატანმა, რომელმაც პროფესიონალური კარიერა "მალმოში" 1999 წელს დაიწყო, ჩემპიონატების მოგება 4 სხვადსხვა ლიგაში შეძლო. მას მეტსახელიც შეარქვეს – იბრაკადაბრა, ჯადოსნური თამაშის გამო.