"ჯანდაცვის სამინისტრო სუს-ის მიერ ზეწოლის ქვეშაა... ინფორმაცია, თითქოს ბერლინის კლინიკამ პაციენტის მიღებაზე უარი თქვა, სიმართლეს არ შეესაბამება"- მაჩალიკაშვილი

საზოგადოება - 17:52, 08 Jan, 2018

3097

პანკისში დაჭრილი თემირლან მაჩალიკაშვილის მამა, მალხაზ მაჩალიკაშვილი ინფორმაცია, თითქოს ბერლინის კლინიკამ უარი თქვა პაციენტის მიღებაზე, სიმართლეს არ შეესაბამება.
ოჯახმა გაარკვია, რომ ბერლინის ერთ-ერთი კლინიკა პაციენტის მიღებისთვის ნებისმიერ დროს მზად არის.
მალხაზ მაჩალიკაშვილის თქმით, ჯანდაცვის სამინისტრო უსაფრთხოების სამსახურის ზეწოლის ქვეშ არის.

"ვითხოვ, რომ ჩემი შვილი გადაიყვანონ გერმანიაში, რადგან მისი ჯანმრთელობის მდგომარეობიდან გამომდინარე ერთი წუთის დაკარვა არ შეიძლება. მე ეს 4 დღე მალოდინეს, ვითომ გერმანიამ უარი თქვა პაციენტის მიღებაზე. ახლა კი აღმოჩნდა, რომ გერმანიას უარი არ უთქვამს. ჩვენ გერმანიაში გვყავს ხალხი, რომლებიც პირდაპირ მივიდნენ ადმინისტრაციაში, გაარკვიეს, არის თუ არა უარი ნათქვამი და გაირკვა, რომ პაციენტს ამ წუთასაც ელოდებიან ბერლინში, ”შარიტეს” კლინიკაში.
ჯანდაცვის სამინისტროს დადანაშაულებაც არ შეიძლება, რადგან უსაფრთხოების სამსახურის მხრიდან ზეწოლის ქვეშ არიან. რამდენადაც მე ვფიქრობ, ამ ბავშვის ჯანმრთელობა არ სურთ. ამიტომ თურქეთში სადღაც ნახეს დაბალი ჯგუფის კლინიკა და უნდათ, რომ იქ გადააგზავნონ. მე ”კოჩის” კლინიკიდან, რომელიც თურქეთის ერთ-ერთი უძლიერესი კლინიკაა, თანხმობა ახლა მივიღე. მოვითხოვ ჩემი შვილი კონკრეტულად ბერლინის კლინიკაში იქნას გადაყვანილი. მთელი საქართველოს მოსახლეობას ვთხოვ გვერდში დამიდგნენ, რომ ჩემი შვილი ბერლინის კლინიკაში გადაიყვანონ. იქიდან დღეს დამიკავშირდნენ და მეუბნებიან, რომ ერთი წუთის დაკარგვაც კი არ შეიძლება, სასწრაფოდ გადმოიყვანეთ თქვენი შვილიო”, - განაცხადა მალხაზ მაჩალიკაშვილმა.