ალილოს მონაწილეები ლანჩხუთის მერიიდან ხელმოცარულები დაბრუნდნენ

საზოგადოება - 16:51, 08 Jan, 2018

3134

ალილოს მსვლელობაში ლანჩხუთის მსვლელობაში არც მერმა და არც საკრებულოს თავმჯდომარემ მონაწილეობა არ მიიღეს.

უფრო მეტიც, ადმინისტრაციულ შენობასთან მისულ ალილოს მონაწილეებს შენობა დაკეტილი დახვდათ.

ამის შესახებ ჩვენთან საუბრისას ერთ-ერთმა მონაწილემ, გივი ცინცაძემ განაცხადა. მისი თქმით, ერთადერთი, ვინც მსვლელობაში ჩაერთო, ლანჩხუთის პოლიციის უფროსი იყო:

"არც მეწყინებოდა, პოლიციის უფროსს რომ ეს არ გაეკეთებინა, რომ არ დახვედროდა ალილოს მონაწილეებს ხელდამშვენებული ტკბილეულით. მას საერთოდ არ ჰქონდა ამის ვალდებულება და ადამიანურად გააკეთა, ლანჩხუთის მერს, კი რომელიც ვალდებული იყო ჩართულიყო ამაში, იმიტომ, რომ შეჭირვებულებისთვის, მოხუცებისთვის, სოციალურად მძიმე პირობებში მყოფი ბავშვებისთვის უნდა გადაგვეცა ეს საჩუქრები და ტკბილეული, არც კი უფიქრია, რომ თავი შეეწუხებინა და მცირედი მაინც გაეკეთებინა ამ ხალხისთვის. მერს, რომელმაც უსირცხვილოდ აიღო პრემია და დაარქვა მეცამეტე ხელფასი. განათლებაც არა აქვს ამდენი, რომ იცოდეს, ეს მეცამეტე ხელფასი ასერთოდ არ არსებობს. კომუნიზმში ვართ? ადმინისტრაციული შენობა საერთოდ დაკეტილი იყო. კვირა დღე კი იყო, მაგრამ ალილოობა იმართებოდა, შობა იყო, ყველაზე ძვირფასი ქრისტიანული დღესასწაული. სირცხვილია ეს ყველაფერი"-გვეუბნება ცინცაძე.

თუ რა მიზეზით ვერ ჩაერთო ალილოს მსვლელობაში ლანჩხუთის მერი და მერიის თანამშრომლები, ამ კითხვით პრესსამსახურს დავუკავშირდით.

ლანჩხუთის მუნიციპალიტეტის მერიაში მომხდარ ფაქტს ადასტურებენ, თუმცა, კონკრეტულ მიზეზებზე საუბარს, თუ რატომ ვერ მოხერხდა მერიის მხრიდან ტრადიციულ ალილოში მონაწილეობა, თავს არიდებენ.

მაკა სულაბერიძე, ლანჩხუთის მერიის პრეს სამსახური:"გარკვეულ მიზეზთა გამო ვერ მოხერხდა მონაწილეობა, თუმცა მერია ამის გამო გეგმავს საკალანდოდ შეჭირვებულთათვის საჩუქრების დარიგებას" - გვითხრა პრეს სამსახურის ხელმძღვანელმა.