კალათბურთში გარიგებული მატჩების საქმე - დაკავებული თემურ დათიკაშვილი გულის შეტევით სამედიცინო დაწესებულებაში გადაიყვანეს. როგორც ცნობილია, დათიკაშვილი სასჯელაღსრულების დაწესებულებიდან ღუდუშაურის სახელობის კლინიკაში გასულ ღამეს მოათავსეს.

ასევე, ცნობილია, რომ დათიკაშვილს ოპერაცია უტარდება.

„ოჯახის წევრებს გუშინ დაურეკეს ციხიდან და შეატყობინეს, რომ თემურ დათიკაშვილი ძალიან ცუდ მდგომარეობაში იყო. ციხის ადმინისტრაციამ გადაწყვიტა, რომ სასწრაფოდ გადმოეყვანათ ღუდუშაურის კლინიკაში. ჩვენ საკმაოდ მწირი ინფორმაცია გვაქვს, თუმცა ვიცით, რომ უტარდება სათანადო გამოკვლევები და ამჟამად საოპერაციო ბლოკშია შეყვანილი. ველოდებით ოპერაციის დასრულებას. არ ვიცით არც დიაგნოზი, თუ რით შეიყვანეს კლინიკაში, მაგრამ ეჭვი არ გვეპარება, რომ ეს იყო დიდი სტრესის ფონზე განვითარებული. გუშინ ვნახე ის დაწესებულებაში და ნორმალურად გრძნობდა თავს. რაც შეეხება ფიზიკურ ზემოქმედებას, ამას გამოვრიცხავ”, - განაცხადა ადვოკატმა თამარ აბესაძემ.