ჩატაევს ჩემს წინაშე ნუ ახსენებთ, ჩემს შვილს მასთან არანაირი ნაცნობობა არ აკავშირებს

ჩატაევს ჩემს წინაშე ნუ ახსენებთ, ჩემს შვილს მასთან არანაირი ნაცნობობა არ აკავშირებს - მალხაზ მაჩალიკაშვილი

საზოგადოება - 17:38, 03 Jan, 2018

2749

დაჭრილი თემირლან მაჩალიკაშვილის მამა ჟურნალისტებს მოუწოდებს, მასთან აჰმედ ჩატაევის სახელს ნუ ახსენებენ.

მალხაზ მაჩალიკაშვილი მისი შვილის ჩატაევთან კავშირსა და ნაცნობობას კატეგორიულად გამორიცხავს.

„ჩემს შვილს ჩატაევთან არანაირი ნაცნობობა არ აკავშირებს. ძალიან გთხოვთ, ჩატაევს ჩემს წინაშე ნუ ახსენებთ“, - განაცხადა მალხაზ მაჩალიკაშვილმა.

მისივე თქმით, სპეცოპერაციის დროს სამართალდამცველებმა შეცდომები დაუშვეს.

„დამოუკიდებელმა ექსპერტმა უნდა შეისწავლოს ვითარება, რომ ამ ყველაფერს ბოლო მოეღოს. ვინც ესროლა და გასცა ეს ბრძანება, ისინი სამუდამო პატიმრობით უნდა გასამართლდნენ. ხელყუმბარის გადაღების საშუალება საიდან მომეცემოდა, როცა იმ დროს ტელეფონი და საერთოდ ყველაფერი ჩამორთმეული მქონდა. ხელყუმბარა იყო საძინებელში, კუთხეში, რომ შევიხედე, საწოლი მთლიანად სისხლიანი იყო, ასევე სისხლიანი იყო ზეწრები, გადასაფარებლები და ის ტელეფონიც, რომელიც თემირლანს ხელში ეჭირა სროლის დროს. რომ მითხრეს, ხელყუმბარა უნდა გაეხსნაო, ვიკითხე, სად არის ხელყუმბარა-მეთქი. მივიხედე და კუთხეში იდო. ხელყუმბარაზე სისხლი ვერ შევნიშნე. ამ დროს კითხვა დავსვი, ტელეფონზე სისხლია და ხელყუმბარაზე არა-მეთქი? მაგათ იმ დღიდანვე უცნაური შეცდომები დაუშვეს. ამას დავამტკიცებ და ეს პირველივე დღეს ვთქვი. ჩემი შვილის უდანაშაულობას დავამტკიცებ“, - განაცხადა მალხაზ მაჩალიკაშვილმა.