პანკისის ხეობაში ჩატარებული სპეცოპერაციისას დაჭრილი თემირლან მაჩალიკაშვილისთვის კიდევ ერთი ოპერაციის ჩატარებას მოსკოვიდან მოწვეული პროფესორი მიზანშეწონილად არ მიიჩნევს. ამის შესახებ ჟურნალისტებს კონსილიუმიდან გამოსულმა ადვოკატმა, მარიამ კუბლაშვილმა განუცხადა, რომელიც შეკრებას ესწრებოდა.

უფლებადამცველის თქმით, არის ვერსია, რომ თემირლან მაჩალიკაშვილის გადაყვანა განხორციელდეს გერმანიის, ისრაელის ან თურქეთის კლინიკაში, თუმცა ჯერ საბოლოო გადაწყვეტილება მიღებული არ არის.

როგორც გაირკვა, უცხოელმა სპეციალისტმა რეაბილიტაციის კურსის მაღალი ხარისხით წარმართვის რეკომენდაცია გასცა.

"დღის ბოლოს კონსილიუმი გაიმართება და ექიმები მიიღებენ გადაწყვეტილებას ტრანსპორტირებასთან დაკავშირებით - რამდენად სარისკო იქნება, აიღებს თუ არა პასუხისმგებლობას უშუალოდ ის კლინიკა, რომელიც მოახდენს ტრანსპორტირებას, ვინაიდან ჩვენი ექიმები ამაზე პასუხისმგებლობას ვერ აიღებენ. მოწვეულია სპეციალისტი მოსკოვის ბურდენკოს სახელობის ნეიროქირურგიის ცენტრიდან, რომელმაც თავისი პოზიცია დააფიქსირა, რომ ამჯერად განმეორებით ოპერაცია მიზანშეწონილი არ არის და უბრალოდ რეაბილიტაციის პერიოდი უნდა იყოს რაც შეიძლება მაღალი ხარისხის”, - განაცხადა მარიამ კუბლაშვილმა.