30 დეკემბერი ლეგენდარული საოპერო პრიმადონას ცისანა ტატიშვილის დაბადების დღეა.

ცისანა ტატიშვილი 1937 წელს თბილისში დაიბადა.დრამატული სოპრანო 1963-2001 წლებში იყო ზ. ფალიაშვილის სახელობის თბილისის ოპერისა და ბალეტის თეატრის წამყვანი სოლისტი.

თბილისში, მოსკოვის „დიდ თეატრში“, პეტერბურგის “მარიას თეატრში”, ასევე ევროპის საოპერო თეატრების სცენებზე, მის საშემსრულებლო კარიერას უკავშირდება ვაგნერისა და შტრაუსის ისეთი ურთულესი ოპერები როგორიცაა „ლოენგრინი, „მფრინავი ჰოლანდიელი“, „სალომეა“.

გამოჩენილი ქართველი სოპრანო გამოდიოდა მოსკოვის „დიდი თეატრის“, პეტერბურგის „მარიას თეატრის“, ბერლინის „კომიშე ოპერის“, „დოიჩე ოპერის“, პრაღის, საარბრიუკენის, მიუნჰენის, კიოლნის, ბაზელის, ლისაბონის, სოფიას, ვარშავას, ლონდონის, ათენის, ვენის თეატრებში, ასევე, ყოფილი საბჭოთა კავშირის დედაქალაქების ყველა მნიშვნელოვან თეატრებში.

ცისანა ტატიშვილს მსოფლიოს გამოჩენილ რეჟისორებთან, ჰერმან ვედეკინდთან და ვალტერ ფელეზენშტეინთან მომზადებული აქვს სენტას, ორტრუდას და აიდას საოპერო პარტიები.

ლეგენდარული პრიმადონა, რიხარდ შტრაუსის „სალომეას“ ერთ-ერთი პირველი და საუკეთესო შემსრულებელია ყოფილ საბჭოთა კავშირში, რისთვისაც მსოფლიო მუსიკის ენციკლოპედიაში იგი სალომეს შემსრულებელთა მსოფლიოს სამეულშია შესული ბირგიტ ნილსონთან და მონსერატ კაბალიესთან ერთად.

ცისანა ტატიშვილი იყო შ. რუსთაველისა და ზ. ფალიაშვილის სახელობის სახელმწიფო პრემიების, ასევე ზურაბ ანჯაფარიძის სახელობის პრემიის ლაურეატი, ბრწყინვალების საპრეზიდენტო ორდენის კავალერი, ღირსების ორდენოსანი, საქართველოსა და საბჭოთა კავშირის სახალხო არტისტი, თბილისის სახელმწიფო კონსერვატორიის პროფესორი, შვეიცერის საპატიო ორდენის კავალერი, ჰუმანიტარული აკადემიის აკადემიკოსი, ქ.თბილისის საპატიო მოქალაქე.

თბილისის ოპერისა და ბალეტის სახელმწიფო აკადემიური თეატრის წინ, ცისანა ტატიშვილის სახელობითი ვარსკვლავი 2010 წელს გაიხსნა.

ცისანა ტატიშვილი 2017 წლის 23 სექტემბერს 80 წლის ასაკში ინსულტის დიაგნოზით გარდაიცვალა. დაკრძალულია დიდუბის მწერალთა და საზოგადო მოღვაწეთა პანთეონში.