ხალხის ხოცვა უნდა დასრულდეს! - აქცია პარლამენტთან

საზოგადოება - 16:05, 30 Dec, 2017

2935

პარლამენტის შენობასთან აქცია გაიმართა. მოქალაქეები უკანასკნელი რამდენიმე დღის განმავლობაში საქართველოს სხვადასხვა ქალაქებში მუშების გარდაცვალებისა და დაშავების ფაქტებს აპროტესტებენ.

სამოქალაქო საზოგადოების ის წარმომადგენლებმა საკანონმდებლო ორგამოსთან მიიტანეს ბანერი: "ხალხის ხოცვა უნდა დასრულდეს!".

აქციის მონაწილეები შრომის უსაფრთხოების კანონის სასწრაფოდ მიღებას ითხოვენ, რომლის განხილვაც პარლამენტმა რამდენიმე თვით გადადო.

"უკანასკნელი 10 წლის მანძილზე სამუშაო ადგილზე ჩვენ ყველამ ერთად 500 მდე დასაქმებული დავკარგეთ, ხოლო ამავე მონაცემებით 800 მდე დასახიჩრდა. ამ საშინელი მონაცემების მიღმა კონკრეტული ოჯახების ტრაგედიები, ადამიანური ისტორიები და დიდი ტკივილი იმალება.

დღემდე დასაქმების ადგილზე იღუპებიან ადამიანები, რომლებიც საარსებო მინიმუმის გამო თანხმდებიან უმეტესწილად მძიმე შრომით პირობებს, სადაც შრომითი ექსპლუატაცია, აუნაზღაურებელი ზეგანაკვეთური სამუშაო, მინიმალური სოციალური გარანტიები თუ დაბალი შრომითი ანაზღაურება, გავრცელებულ პრაქტიკას წარმოადგენს.

საქართველოს პარლამენტმა, რომელმაც რამდენიმე ხნის წინ უარი განაცხადა შრომის უსაფრთხოების კანონპროექტის განხილვაზე, უნდა აიღოს რეალურად პასუხისმგებლობა იმ მავნებლობაზე და იმ ტრაგედიებზე, რაც ხდება ჩვენს ქვეყანაში,“ - განაცხადა აქციის მონაწილემ, ლაშა მესხმა.