თვითმფრინავს მეხი დაეცა - ქუთაისის საერთაშორისო აეროპორტში მგზავრები საკუთარ რეისს ამ დრომდე ელოდებიან

საზოგადოება - 13:18, 30 Dec, 2017

7454

ქუთაისის დავით აღმაშენებლის სახელობის საერთაშორისო აეროპორტში ავიარეისი ლარნაკას მიმართულებით 12:45 საათზე უნდა შესრულებულიყო, თუმცა აეროპორტის ადმინისტრაციის განმარტებით, ის ოთხი საათის დაგვიანებით შესრულდება.
Wizz Air-ის კუთვნილი თვითმფრინავი ავარიულად ბულგარეთის ტერიტორიაზე დაეშვა.

ქუთაისის აეროპორტში აცხადებენ, რომ ქუთაისის აეროპორტიდან ავიარეისის შეფერხება თვითმფრინავზე მეხის დაცემამ გამოიწვია.

„ავიაკომპანია Wizz Air რეისი W66401 ქუთაისი-კავალა, კავალას საერთაშორისო აეროპორტთან მიახლოვებისას, საჰაერო ხომალდზე მეხის დაცემის გამო, გადამისამართდა სოფიას საერთაშორისო აეროპორტში. მგზავრების ტრანსპორტირება სოფიადან კავალას მიმართულებით უზრუნველყოფს ავიაკომპანია.

ამ ეტაპზე, ბორტს უტარდება ინსპექცირება, რომლის დასრულების შემდეგ გაირკვევა, რა გადაწყვეტილებას მიიღებს ავიაკომპანია.

ზემოთ აღნიშნული გარემოებებიდან გამომდინარე, თუ ბორტი შეასრულებს ფრენებს, ქუთაისის საერთაშორისო აეროპორტიდან, დაგვიანებით შესრულდება დღეს 30 დეკემბერს დაგეგმილი რეისები: W66403(ქუთაისი- ლარნაკა) გეგმიური გაფრენა 12:45, W66409 (ქუთაისი- მემინგენი) გეგმიური გაფრენა 18:25.

დეტალურ ინფომაციას რეისების და განრიგში ცვლილებების შესახებ მიიღებთ ჩვენი საინფორმაციოს საშუალებით: 0431 23 70 00; 0431 23 70 01“, – აღნიშნულია განცხადებაში.