„საზოგადოებრივი მაუწყებლის“ სამეურვეო საბჭოს სხდომა, დაახლოებით, ერთი საათია მიმდინარეობს. ბორდის წევრები ერთ-ერთ საკითხად პოეტ ზვიად რატიანის საქმეს, კონკრეტულად, იმ ვიდეომასალას განიხილავენ, სადაც რატიანი დაკავების პროცესია ასახული და რომელიც „საზოგადოებრივმა მაუწყებელმა“ გაავრცელა. საბჭომ განცხადება გააკეთა და მიიჩნია, რომ ის კონტექსტი, როგორც გაშუქდა რატიანი საქმე, სტანდარტის დარღვევაა.

სამეურვეო საბჭო თვლის, რომ არხმა ვიდეომასალის გაშუქებით დაარღვია ადამიანის უფლებები და ეს არი იყო ობიექტური და სამართლიანი გაშუქება. ბორდის წევრების გარკვეული ნაწილი მიიჩნევს, რომ არხმა მსგავსი გაშუქებით ხელი შეუწყო გარკვეულწილად ძალადობის პროვოცირებასა და ზვიად რატიანის უსაფრთხოებას.

საკუთარი პოზიცია დააფიქსირა არხის გენერალურმა დირექტორმა, ვასილ მაღლაფერიძემ. მისი თქმით, თავადაც უკმაყოფილოა მოვლენების მსგავსი განვითარებით:

„ვიღებ პასუხისმგებლობას ბორდის წინაშე, ამავე დროს, მაქვს ჩემი დამოკიდებულება ამ სიუჟეტის მიმართ, ეს არ არის დადებითი, თუმცა ამავე დროს, უნდა ვთქვა, რომ სიამოვნებით შევუშვერ თავს იმ პირველ ქვას, რომელსაც აიღებს და მესვრის ნებისმიერი ტელევიზია. „პირველი არხიც“ მოქმედებდა იმ სტანდარტით, რომელიც არის დადგენილი და ის, რაზე არის ატეხილი ერთი ამბავი, გაუშვა აბსოლუტურად ყველა არხმა. პირველი არხი ადებდა იმ ცნობილ გამონათქვამებს სიგნალს, აქ არის არხები, რომლებიც ამას უშვებდნენ სიგნალის გარეშე, მათ შორის ჩვენზე ადრე. ის, რომ ჩვენ ჯერჯერობით დაბალი ყურებადობა გვაქვს და კოლექტიურად გადაიფარა და გავრცელდა, რომ პირველმა არხმა ეს გაავრცელა და დაატირაჟირა, ეს სიმართლეს არ შეესაბამება“, - განაცხადა ვასილ მაღლაფერიძემ.