„როგორც კი კარი შემოამტვრიეს, მაშინვე ესროლეს. წინააღმდეგობა არ გაუწევია!“ - მაჩალიკაშვილის დედა სპეცოპერაციას იხსენებს

საზოგადოება - 12:17, 28 Dec, 2017

2826

პანკისის ხეობაში ჩატარებული სპეცოპერაციის შედეგად დაჭრილი 19 წლის თემირლან მაჩალიკაშვილის დედა მის სახლში ჩატარებულ სპეცოპერაციის დეტალებზე საუბრობს და აცხადებს, რომ ახალგაზრდა მამაკაცს სპეცდანიშნულების რაზმისთვის წინააღმდეგობა არ გაუწევია.

მაჩალიკაშვილის დედა, მედიკო მარგოშვილი ამტკიცებს, რომ მის შვილს კარის შემტვრევისთანავე ესროლეს.

თემირლან მაჩალიკაშვილის ოჯახი სსპეცრაზმელების დასჯას ითხოვს.

„ჩემს თვალწინ უნდა გაასამართლონ ის ნაძირალა, ვინც ჩემს შვილს ესროლა. როგორც კი კარი შემოამტვრიეს, მაშინვე ესროლეს. წინააღმდეგობის გაწევას ვერ მოახერხებდა. მოწმეებიც არიან, თუ რა ეცვა, როცა საავადმყოფოში გადმოიყვანეს.

ტელეფონით ჩემს ძმისშვილთან ყოფილა კავშირში. ლოგინში იწვა, ტელეფონიც გადავარდნილი აქვს . პირდაპირ აქვთ ნასროლი,“ - განაცხადა მედიკო მარგოშვილმა.

26 დეკემბერს, სუს-მა 5 პირი დააკავა, აქედან 4 პანკისში, ერთი კი - თბილისში. ყველა მათგანს თბილისში, ბერი გაბრიელ სალოსის გამზირზე ჩატარებული სპეცოპერაციისას განეიტრალებულ პირებთან კავშირი და მათი დახმარება ედება ბრალად. პანკისში ჩატარებული სპეცოპერაციის დროს ერთი პირი დაიჭრა.

მამაკაცის მდგომარეობა მძიმეა.