დიდუბის ბაზრობის გარემოვაჭრეები თბილისის მერიასთან აქციას მართავენ. ისინი დიდუბის ბაზრობაზე არსებული ჭიშკრის გაღებას მოითხოვენ, აღნიშნული ჭიშკარი ორ ბაზრობას შორისაა. აქციის ერთ-ერთი მონაწილის განცხადებით, ისინი წარმოადგენენ შპს „მ.ზ“-ს, რომლის ბაზრობის ტერიტორიაც სამი მხრიდან შემოსაზღვრა შპს „დიდუბის“ მფლობელმა.

„ჩვენი შპს მეორე მეზობელმა, შპს „დიდუბემ“ სამი მხრიდან შემოღობა. ჩაკეტილია ყველა გზა, სახანძრო უსაფრთხოების ნორმები დარღვეულია უხეშად, რაზეც ჩვენ გვაქვს ყველანარი საბუთი. არაერთხელ გავაპროტესტეთ. სხვათაშორის, თბილისის ყოფილი მერი დავით ნარმანია მომხრე იყო კარების გაღების, მაგრამ აქამდე არ გადაწყდა ეს საკითხი“, - განაცხადა ლიანა ხელაძემ.

აქციის მონაწილეები თბილისის მერ კახა კალაძეს მიმართავენ, რომ ბაზრობაზე არსებული კარი გაიღოს.