დოკუმენტური ფილმის „მე გადავცურე ენგური“ პროტაგონისტი ნათია თოდუა გერმანული ვოისის გამარჯვებულია.

ანუნა ბუკიას დოკუმენტური ფილმი „მე გადავცურე ენგური“ ომგამოვლილი ადამიანების ყოფასა და ე.წ საზღვრის „არალეგალურად“ გადაკვეთაზე გვიამბობს. ფილმის პროტაგონისტია თოდუების ოჯახი. ოკუპირებულ ტერიტორიაზე და დედაქალაქში გახლეჩილად მცხოვრები შვილები და მშობლები. ფილმში ნაჩვენებია, ოჯახის წევრების ყოველდღიური, ბარიერებით სავსე ყოფა და რუსების მიერ დადგენილი საზღვრის გადაკვეთის სირთულეები. მთავარ გმირთან ერთად ოჯახის წევრების ნაწილი, სიცოცხლის ფასად მალულად კვეთს ე.წ საზღვარს (იმისთვის რომ სახლში მოხვდნენ).

სოფელი რომელშიც ნათიას ოჯახი ცხოვრობს, არა მხოლოდ სასაზღვრო პუნქტმა დააშორა საქართველოს კონტროლირებად ტერიტორიას, არამედ გეოგრაფიულმა საზღვარმა, მდინარე ენგურმა. ენგურს გაღმა დარჩენილ სოფლებში რუსი სამხედროების წესებით ცხოვრობენ. დღემდე საკუთარ ეზოში გადაადგილებაც კი რისკის შემცველია. მათ არ იცავთ კანონი, არა აქვთ სიცოცხლისთვის აუცილებელი პირობები, არ ყავთ ექიმი. ნებისმიერ პრობლემას წყვეტენ საკუთარი ძალებით და შეხედულებისამებრ. ქართული მხარე მათ ვერ იცავს და მთელ რიგ სიტუაციებში, უიმედოდ დარჩენილ მოსახლეობას უწევს თამაში ან თავის მოჩვენება რომ იზიარებს გარკვეულ მოსაზრებებს, რომელსაც აფხაზური ან რუსული მხარე სთავაზობს.