დავით ნარმანია: ზუგდიდის მუნიციპალიტეტი პროექტების განსახორციელებლად 8 მილიონ ლარს მიიღებს

ბიზნესი & ეკონომიკა - 15:04, 16 Jul, 2013

1366

მინისტრი გაეცნო მუნიციპალიტეტში სოფლის მხარდაჭერის პროგრამით დაგეგმილი სამუშაოების გრაფიკს, რომელიც გამგეობაში ცხრილის სახით არის გამოფენილი.

შეხვედრის შემდეგ დავით ნარმანიამ დევნილთა საცხოვრებელი სახლების სამშენებლო სამუშაოები, მშენებარე ყინულის მოედანი, ასევე, სოფელ ინგირის, შამგონასა და ანაკლიის გზის სარეაბილიტაციო სამუშაოები დაათვალიერა. მოგვიანებით მინისტრი ანაკლიაში დატბორილ ოჯახებს შეხვდა და დახმარება აღუთქვა.

დღესვე საქართველოს რეგიონული განვითარებისა და ინფრასტრუქტურის მინისტრი ზუგდიდში მოქმედი არასამთავრობო ორგანიზაციების წარმომადგენლებს შეხვდა.

შეხვედრაზე დეტალურად განიხილეს ზუგდიდის მუნიციპალიტეტში სოფლის მხარდაჭერის პროგრამითა და რეგიონებში განსახორციელებელი პროექტების ფონდიდან მიმდინარე წელს დაფინანსებული პროექტები.

მინისტრის განცხადებით, წელს ზუგდიდის მუნიციპალიტეტი პროექტების განსახორციელებლად 8 მილიონამდე ლარს მიიღებს. "ზუგდიდის მუნიციპალიტეტში რეგიონებში განსახორციელებელი პროექტების ფონდიდან და სოფლის მხარდაჭერის პროგრამის ფარგლებში 200-მდე პროექტი განხორციელდება, რისთვისაც 8 მილიონი ლარი დაიხარჯება", - განაცხადა შეხვედრაზე ნარმანიამ. მნიშვნელოვანია, რომ აღნიშნული პროექტების განხორციელებისას მშენებლობებზე უმეტესად ადგილობრივი მოსახლეობა დასაქმდება.

შეხვედრას ადგილობრივი მოსახლეობა, არასამთავრობო ორგანიზაციები, მუნიციპალიტეტის გამგეობის სამსახურის წარმომადგენლები, საზოგადოება ,,ზუგდიდელი" და მედიის წარმომადგენლები დაესწრნენ.