რუსთავის ,,ფოლადის'' სტადიონზე სოციალური პროექტის „საფეხბურთო ფესტივალი“ დახურვის ცერემონიალი გაიმართა

სპორტი - 09:52, 11 Dec, 2017

18836

საქართველოს ფეხბურთის ფედერაციის, ა(ა)იპ ,,რუსთავის სასპორტო სკოლების განვითარების ცენტრისა’’ და არასამთავრობო ორგანიზაციის „ახალგაზრდული მოძრაობა ჯანსაღი და ნათელი მომავლისთვის“ ერთობლივი სოციალური პროექტის ფარგლებში, რუსთავის ,,ფოლადის’’ სტადიონზე ,,საფეხბურთო ფესტივალის’’ დახურვის ცერემონიალი გაიმართა.

ღონისძიების დახურვას რუსთავის მერი ირაკლი ტაბაღუა, მერის მოადგილე გოჩა ლორია, საქართველოს ფეხბურთის ფედერაციის პრეზიდენტი ლევან კობიაშვილი და ვიცეპრეზიდენტი ალექსანდრე იაშვილი, რუსთავის მაჟორიტარი დეპუტატი საქართველოს პარლამენტში გიორგი ბეგაძე, მუნიციპალიტეტის საკრებულოს წევრები და სხვა მოწვეული პირები დაესწრნენ.

დღეს გამართულ ფინალური შეხვედრაში რუსთავის გუნდები დაუპირისპირდნენ ერთმანეთს. რუსთავის მერმა ირაკლი ტაბაღუამ, საქართველოს ფებურთის ფედერაციის პრეზიდენტ ლევან კობიაშვილთან ერთად, შეჯიბრის ყველა მონაწილე სიგელებით, გამარჯვებული გუნდი კი სპეციალური თასით დააჯილდოვა.

ტურნირში თბილისის, რუსთავისა და ფოთის ვაჟ ფეხბურთელთა გუნდები იღებდნენ მონაწილეობას. სპორტსმენების გარდა შეჯიბრში, სოციალურად დაუცველი და ოკუპირებული ტერიტორიებიდან იძულებით გადაადგილებული ოჯახების შვილები და მზრუნველობას მოკლებული მოზარდებიც ასპარეზობდენ.

,,საფეხბურთო ფესტივალის’’ მიზანი მასობრივი სპორტის განვითარების ხელშეწყობა, მზრუნველობას მოკლებულ და სოციალურად დაუცველ ბავშვებში ჯანსაღი ცხოვრების წესის პოპულარიზაცია, ნიჭიერ მოზარდთა გამოვლენა და საზოგადოებაში მათი ინტეგრაციის მხარდაჭერაა.