ერთ-ერთი ვერსიით, მოსწავლეებს შორის კონფლიქტი, სათამაშო პისტოლეტიდან სროლის გამო დაიწყო

საზოგადოება - 23:30, 02 Dec, 2017

29410

imedinews-ის ინფორმაციით, ხორავას ქუჩაზე, 51-ე სკოლის მოსწავლეებს შორის კონფლიქტი, რომელსაც ორი მოზარდის სიცოცხლე ემსხვერპლა, სკოლის საპირფარეშოში, სათამაშო პისტოლეტიდან სროლის გამო დაიწყო.

როგორც imedinews-ი იტყობინება, დაუდასტურებელი ვერსიით, ერთ-ერთმა მოსწავლემ კლასელს სათამაშო პისტოლეტიდან პლასტმასის ტყვია ესროლა, რასაც კამათი მოჰყვა, რომელიც სკოლის ეზოში გაგრძელდა; ეზოში მოზარდებს შორის დაპირისპირება მანდატურმა განმუხტა, რის შემდეგაც მოსწავლეები სკოლის შენობაში დაბრუნდნენ, თუმცა მოგვიანებით ჩხუბი ხორავას ქუჩაზე განახლდა, როდესაც მოსწავლეს, რომელსაც "ტყვია" ესროლეს, სხვა სკოლიდან მეგობრებმა მიაკითხეს. საქმის გარჩევა ჩხუბში გადაიზარდა, რა დროსაც ერთი მოზარდი, რომელიც კლასელებს აშველებდა, დაჭრეს - ის საავადმყოფოში მიყვანამდე გარდაიცვალა. მეორე მოსწავლე კი საავადმყოფოში გარდაიცვალა. მას სამი ოპერაცია ჩაუტარდა. მოზარდის მდგომარეობა კრიტიკულად მძიმე იყო და სამედიცინო პერსონალმა მისი გადარჩენა ვერ შეძლო.

სამართალდამცავებმა ცხელ კვალზე დანაშაულში ეჭვმიტანილი, 2001 წელს დაბადებული მოზარდი დააკავეს, მიმდინარეობს კიდევ ერთი ეჭვმიტანილის სამძებრო სამუშაოები.

გავრცელდა ინფორმაცია, რომ მოსწავლის მკვლელობაში ეჭვმიტანილი სავარუდოდ, მინისტრის ოჯახის გარემოცვის წევრია.