"სახლები დაგვეშლება ხალხო, ნერვოზი დაგვემართა უკვე" - შუხუთში ჩინური კომპანიის წინააღმდეგ აქცია იმართება

საზოგადოება - 12:17, 01 Dec, 2017

8657

შუხუთში ჩინური კომპანიის წინააღმდეგ აქცია იმართება. მოსახლეობა ავტობანზე მომუშავე ჩინური კომპანიის, "„სინოჰიდროს" საქმიანობას აპროტესტებს.

დღეს დილიდან შუხუთი-ლანჩხუთის დამაკავშირებელი ცენტრალური გზა რამდენიმე ადგილობრივმა გადაკეტა. ამ წუთებში ადგილზე კომპანიის კუთვნილი რამდენიმე სატვირთო მანქანა გაჩერებულია და მძღოლებს გადაადგილების საშუალებას არ აძლევენ.

მათი თქმით, სატვირთო მანქანების ხშირი მიმოსვლის გამო მათ საცხოვრებელ სახლებს პრობლემები ექმნებათ, აწუხებთ მტვერი და ხმაური. აღნიშნულის მოგვარებას შუხუთელები კატეგორიულად ითხოვენ, და ამბობენ, რომ წინააღმდეგ შემთხვევაში, სატვირთო მანქანებს გადაადგილების საშუალებას არ მისცემენ.

"ჩვენი ძირითადი მოთხოვნა არის, რომ მძიმეწონიანი მანქანები ნუ მოძრაობენ მთელი ღამის განმავლობაში, დაგვეშალა სახლები. სულ დაბზარულია კედლები. შუაღამეზე ატეხავენ სიგნალებს და მოსვენება აღარ გვაქვს. ცალკე მტვერი გვახრჩობს, აქეთ იმის შიში, სახლები თავზე არ ჩამოგვეშალოს. ვითხოვთ კომპენსაციებს მოყენებული ზარალისთვის. საერთოდ არანაირ პასუხისმგებლობას არ იღებენ საკუთარ თავზე. მოლაპარაკებებზეც არ მოდიან" - გვეუბნება ადგილობრივი ირაკლი ჩხაიძე.

"30 ოჯახი ვართ აქ ასეთ მძიმე მდგომარეობაში. ჩვენი პროტესტის ძირითადი მიზეზი არის, რომ ეს მძიმეწონიანი მანქანები, რომელიც ჩინური კომპანიის საკუთრებაა, ძალიან დიდ ზარალს გვაყენებს. მტვერია საშინელი, ხმაური. სახლები დაგვეშლება ხალხო. ვინმემ დროულად თუ არ მოგვხედა. ნერვოზი დაგვემართა. გზის გახსნას არ ვაპირებთ, მანამ, სანამ არ დაკმაყოფილდება ჩვენი მოთხოვნები. ამხელა მანქანები მოსვენებას აღარ გვაძლევენ. ქვა-ღორღი რომ გადააქვთ, იყრება გზადაგზა, ეს ასფალტსაც აფუჭებს. ლანჩხუთის მერიას რაც შეეძლო, ყველაფერი გაკეთა. კომპანიამ კეთილი ინებოს, ან გადაგვიხადოს ზარალის საფასური, ან მოძებნონ ალტერნატიული გზა, რომ ჩვენ დაგვასვენონ"-გვითხრა გულო სარიშვილმა.

ჩინური კომპანიის წინააღმდეგ, ადგილობრივებმა აქცია ბოლო ერთი თვის განმავლობაში უკვე რამდენჯერმე გამართეს, თუმცა პრობლემა ისევ პრობლემად რჩება.

ჩვენ კომენტარისთვის დავუკავშირდით ლანჩხუთის მუნიციპალიტეტის მერს, ალექსანდრე სარიშვილს, რომელიც გვეუბნება, რომ ის რაც მათზეა დამოკიდებული, ადგილობრივი ხელისუფლება ყველა ღონეს იხმარს, აღნიშნული პრობლემის დროულად გადაჭრაში.

"შუხუთის მოსახლეობას ჩინურ კომპანიასთან სამი ძირითადი მოთხოვნა ჰქონდათ, კომპენსაციები, ალტერნატიული გზის მოწყობა სატვირთო მანქანებისთვის, ან ამ 30 ოჯახის საცხოვრებლად სხვა ადგილზე გადაყვანა, იმიტომ, რომ მათ ადგებათ ძალიან სერიოზული ზარალი, წინააღმდეგ შემთხვევაში ისინი გადაკეტავდნენ გზას. ჩვენ ვესაუბრეთ კომპანიის წარმომადგენლებს, ისინი ამბობენ, რომ ტექნიკურ სამუშაოებს გასწევენ მოსახლეობისთვის, რა ზარალიც მათი მხრიდან მიიღეს, მაგრამ ფულად კომპენსაციაზე უარს აცხადებენ. როდესაც ეს ინფორმაცია მივაწოდეთ ადგილობრივებს, მათ გადაწყვტიტეს გაემართათ აქცია. ახლა მაქსიმალურად უნდა ვიმუშაოთ იმაზე, რომ მოხდეს ალტერნატიული გზის მოძიება, რომ ლის მეშვეობითაც, არც მოსახლეობა დაზარალდება და არც კომპანია, რომელიც ადგილზე მნიშვნელოვან სამუშაოებს ასრულებს"-გვითხრა ალეკო სარიშვილმა.