თბილისის ერთ-ერთი საბავშვო ბაღის 37 აღსაზრდელი ტუბერკულოზის ცენტრში გამოკვლევაზე მიიყვანეს

საზოგადოება - 20:54, 29 Nov, 2017

10817

თბილისის ერთ-ერთ საბავშვო ბაღში საგანგაშო ფაქტი დაფიქსირდა. „ქრონიკის“ ინფორმაციით, ბაღის ყველა აღსაზრდელი ტუბერკულოზის ცენტრში გამოკვლევაზე მიიყვანეს, ამის მიზეზი კი აღმზრდელის ავადმყოფობა გახდა, რომელმაც დაავადების შესახებ არაფერი იცოდა და ბავშვებთან მუშაობას ჩვეულებრივად განაგრძობდა. მას შემდეგ, რაც ამ ფაქტის შესახებ გახდა ცნობილი, ჯანდაცვის სამინისტრო აღმზრდელების ჯანმრთელობის შემოწმების გამკაცრებაზე ალაპარაკდა. უწყების თქმით, აღნიშნული საკითხი საკანონმდებლო დონეზე უნდა დარეგულირდეს.

ბაღის აღსაზრდელებზე ჩატარებული გამოკვლევებით დადგინდა, რომ აღმზრდელმა მათი დაინფიცირება ვერ მოასწრო .

ტუბერკულოზისა და ფილტვის დაავადებათა ცენტრის დირექტორის, ზაზა ავალიანის თქმით, მიღებული იქნა ყველა საჭირო ზომა და გამოიკვლიეს 37-ვე ბავშვი. მისივე განცხადებით, არსებობს შემთხვევები, როდესაც სააღმზრდელო დაწესებულებებში მომუშავე პირები დაავადებულები არიან ტუბერკულოზით, მაგრამ ამის შესახებ თავადაც არ იციან.

ავალიანის თქმით, აღმზრდელმა სიმპტომების გამოვლენის შემდეგ ერთ-ერთ სამედიცინო დაწესებულებას მიმართა, თუმცა ოჯახის ექიმმა დიაგნოზი შეცდომით დაუსვა, რის შემდეგაც საბავშვო ბაღში მუშაობა ჩვეულებრივად გააგრძელა. რამდენიმე კვირაში კი, ტუბერკულოზის ცენტრში ინფექციური დაავადების გართულებული ფორმით მიიყვანეს.

„ის დღეს ჩვენთან არის როგორც პაციენტი და მისი მდგომარეობა მართვადია.“- განაცხადა ავალიანმა, მისი თქმით, ეჭვის არსებობის შემთხვევაში ამ ტიპის დაწესებულების პერსონალმა აუცილებლად უნდა მიმართოს სპეციალიზებულ დაწესებულებებს.

ინფორმაციას აღნიშნულის შესახებ ფლობს ბაგა-ბაღების მართვის სააგენტოც, სადაც ამბობენ, რომნ აღნიშნული საბავშვო ბაღი რამდენიმე დღე დაკეტილი იყო და შესაბამისი სამუშაოები ჩატარდა.

ბაგა-ბაღების მართვის სააგენტოს ხელმძღვანელის, კახა გვანცელაძის თქმით, საბავშვო ბაღში სააღმზრდელო პროცესი მხოლოდ მას შემდეგ აღსდგა, რაც ეპიდემიოლოგიური სამსახურისგან ამის ნებართვა მიიღო.

„როგორც კი ეპიდემიოლოგიურმა სამსახურმა დაადასტურა, რომ ყველაფერი წესრიგშია, სააღმზრდელო პროცესი აღდგა. პირველი რიგის პრიორიტეტი არის ბავშვთა უსაფრთხოება და რეგლამენტის მკაცრად შესრულება თითოეულ საბავშვო ბაღს მოეთხოვება.“- განაცხადა გვანცელაძემ.

არასამთავრობო სექტორი მომხდარს საგანგაშოს უწოდებს და ხაზს საზოგადოების მეტად ინფორმირებულობის აუცილებლობას უსვამს . არასამთავრობო სექტორის თქმით, დაავადების გავრცელების ერთ-ერთი მთავარი მიზეზი ტუბერკულოზთან დაკავშირებული ტაბუა, რომლის გამოც ინფიცირებული ადამიანები სამედიცინო დაწესებულებებისთვის მიმართვისგან თავს იკავებენ.