"დეკანოზ გიორგი მამალაძეს ომბუდსმენის აპარატის ცხელ ხაზზე დარეკვიც უფლება არ მიეცა"

საზოგადოება - 18:07, 29 Nov, 2017

1579

დეკანოზ გიორგი მამალაძეს ომბუდსმენის ცხელ ხაზზე დარეკვის უფლება არ მიეცა - ამის შესახებ ადამიანის უფლებათა ცენტრში (HRC) აცხადებენ.

იურისტთან შეხვედრისას გიორგი მამალაძემ განაცხადა, რომ 13 ნოემბერს მან სახალხო დამცველის აპარატის ცხელ ხაზზე (1481) დარეკვა მოითხოვა, რაზეც მეცხრე პენიტენციური დაწესებულების დირექტორის მოადგილემ და თანამშრომელმა უარი უთხრეს იმ მოტივით, რომ მას ამოწურული ჰქონდა სამი ზარის განხორციელების ლიმიტი.

იმავე დღეს მსჯავრდებულმა წერილობით მიმართა დაწესებულების დირექტორს და მოითხოვა წერილობითი განმარტება. დაწესებულების დირექტორმა, ზაზა ჯამატაშვილმა მსჯავრდებულს სატელეფონო ზარის განხორციელებაზე უარის საფუძვლად მიუთითა, რომ მას ამოწურული ჰქონდა საკუთარი ხარჯით ტელეფონით სარგებლობის თვიური ლიმიტი.

ადამიანის უფლებათა ცენტრი დაუშვებლად მიიჩნევს პენიტენციური დაწესებულების მხრიდან მსჯავრდებულისთვის სახალხო დამცველის ცხელი ხაზის ნომერზე დარეკვის შეზღუდვას ლიმიტის ამოწურვის მიზეზით.

"ზოგიერთ პენიტენციურ დაწესებულებაში გამოკრულია კიდეც ინფორმაცია, რომ თვეში სამი ზარის ლიმიტი არ ეხება სახალხო დამცველის ოფისის ტელეფონის ნომრებზე, მათ შორის - ცხელ ხაზზე დაკავშირებას", - ნათქვამია განცხადებაში.