"პრევენციული ზომები უკვე დაგეგმილია"- ზურაბ პატარიძემ "ლეოგრანდში" დაღუპული ბიჭის ოჯახს მიუსამძიმრა

საზოგადოება - 16:19, 29 Nov, 2017

1708

გორში, წმინდა ნიკოლოზის სახელობის ტაძარში, 24 ნოემბერს სასტუმრო "ლეოგრანდში" დატრიალებული ტრაგედიის დროს გარდაცვლილი 22 წლის ბექა შატაკიშვილის სამოქალაქო პანაშვიდი მიმდინარეობს. „ნიუპოსტის“ კორესპონდნეტის ცნობით, გარდაცვლილის ოჯახს ცოტა ხნის წინ თავდაცვის მინისტრმა ლევან იზორიამ, დევნილთა მინისტრმა სოზარ სუბარმა, აჭარის მთავრობის მეთაურმა ზურაბ პატარიძემ და რეგიონის ხელისუფლების წარმომადგენლებმა მიუსამძიმრეს. როგორც ზურაბ პატარიძემ ჟურნალისტებს განუცხადა, ბათუმში დარიალებულ ტრაგედიაზე საგამოძიებო მოქმედებები ინტენსიურად მიმდინარეობს და ყველა დამნაშავე დაისჯება.

„პირველ რიგში მინდა მივუსამძიმრო ოჯახს, ძალიან მძიმე წუთები არის ჩვენი ქვეყნისათვის. დღეს ჩამოვედით გორში, რათა უკანასკნელ გზაზე გავაცილოთ ახალგაზრდა ვაჟკაცი, რომელიც შეეწირა ამ ძალიან მძიმე ტრაგედიას. რაც შეეხება გამოძიებას, გამოძიება მიმდინარეობს და ერთი რამ მკაფიოდ მინდა გავიმეორო, რომ იქნება ყველა ზომები მიღებული, დაისჯება ყველა ის კომპანია, არ აქვს მნიშვნელობა ეს იქნება სახელმწიფო სტრუქტურის წარმომადგენლები თუ კერძო კომპანიები თუ ვის რა დანაშაული აქვს ამ ტრაგედიაში. ზოგადად პრევენციული ზომები უკვე დაგეგმილი არის, შინაგან საქმეთა სამინისტროსთან ერთად ჩვენ ამ დღეებში ვგეგმავთ შეხვედრას ბიზნესის წარმომადგენლებთან, სასტუმროს მენეჯერებთან, ასევე სხვადასხვა უწყებების წარმომადგენლებთან. პერმამენტულად მოხდება მათი შემოწმებაც და ასევე წვრთნები გაიმართება პერსონალისათვის და ჩვენ ამაში აუცილებლად მივიღებთ მონაწილეობას.“-აცხადებს ზურაბ პატარიძე.

შეგახსენებთ, ბათუმში, სასტუმრო „ლეოგრანდში“ გაჩენილ ხანძარს 11 ადამიანის სიცოცხლე იმსხვერპლა.