"უსაფრთხოების ზომები სტანდარტებს შეესაბამება, სასტუმრო დაჯარიმებული არ ყოფილა" - "ლეოგრანდი"-ს მფლობელის პირველი კომენტარი

საზოგადოება - 10:24, 27 Nov, 2017

3801

სასტუმრო "ლეოგრანდი"-ს მფლობელი ეროლ ავგორენი პირველ კომენტარს აკეთებს. ავგორენი ირწმუნება, რომ უსაფრთხოების ნორმებთან დაკავშირებით სასტუმრო დაჯარიმებული არ ყოფილა.

"ლეოგრანდი"-ს მფლობელმა სასტუმროში მომხდარი ტრაგედიის გამო გარდაცვლილთა ოჯახის წევრებს მიუსამძიმრა.

”სასტუმროში უსაფრთხოების ზომები სტანდარტებს შეესაბამება. სასტუმროს უსაფრთხოებასთან დაკავშირებით ჯარიმა არ ჰქონია... ჩამოსული იყვნენ საქართველოს პრემიერ-მინისტრი, მთავრობის წევრები, ჩვენ მათთან ერთად ვიმუშავეთ აღნიშნულ საკითხთან დაკავშირებით. გამოვთქვამთ ღრმა მწუხარებას და ვუსამძიმრებთ გარდაცვლილების ოჯახებს. აქ დასაქმებული პერსონალი არ გათავისუფლდება სამსახურიდან”, - განაცხადა ავგორენმა.

ბათუმში, სასტუმრო "ლეოგრანდში" ხანძარი 24 ნოემბერს, დაახლოებით 20.00 საათზე გაჩნდა. ხაძრის შედეგად 11 ადამიანი დაიღუპა, რომელთაგან 10 საქართველოს და 1 ირანის რესპუბლიკის მოქალაქეა, ჰოსპიტალიზებული იყო 21 ადამიანი.

გამოძიება საქართველოს სსკ-ს 243-ე მუხლის მე-3 ნაწილით მიმდინარეობს, რაც სახანძრო უსაფრთხოების წესის დარღვევას გულისხმობს, რამაც ორი ან მეტი ადამიანის სიცოცხლის მოსპობა ან სხვა მძიმე შედეგი გამოიწვია.