შვედურმა კომპანიამ H&M მსოფლიოს ბევრ ქვეყანაში პოპულარობა ხელმისაწვდომი ფასის წყალობით მოიპოვა.

დიდი მოლოდინები იყო საქართველოშიც. ჯერ მის ქართულ აბრევიატურაზე ჰ და მ-ზე გაიხლიჩა სოციალური ქსელი, მაგრამ ალბათ, ვერავინ წარმოიდგენდა, რომ ერთი ჩვეულებრივი, საშუალო დონის ბრენდის მაღაზიის გახსნა, საზოგადოებაში კლასობრივ დიფერენციაციაზე კამათს გამოიწვევდა.

16 ნოემბერს, ოფიციალურ გახსნამდე ორი დღით ადრე , თბილისში, თავისუფლებაზე წითელი ხალიჩა გაიშალა, საფეხმავლო გზა სადღესასწაულოდ მოირთო და H&M-ის მაღაზია მხოლოდ VIP მომხარებლებისთვის გაიხსნა, მოქალაქეთა ნაწილი ქუჩიდან აკვირდებოდა მაღაზიის გახსნის ღონისძიებას.

ღონისძიებას ესწრებოდნენ მსახიობები, მომღერლები, ჟურნალისტები, მოდის სფეროს წარმომადგებები. ისინი H&M-ის სამოსში გამოწყობილები პოზირებდნენ მაღაზიის წინ, მეტროსადგურ თავისუფლების მოედნის მიმდებარე ტროტუარზე დაგებულ წითელ ხალიჩაზე.

დიახ, მაღაზია მხოლოდ მიწვეული სტუმრებისთვის გაიხსნა, რომლებსაც შეეძლოთ ექსკლუზიური 20%-იანი ფასდაკლებით ესარგებლათ სრულ კოლექციაზე, რამაც სოციალურ ქსელებში არაერთგვაროვანი რეაქციები გამოიწვია.

საზოგადოების ნაწილი თვლის, რომ ამაში განსაკუთრებული და მითუმეტეს აღმაშფოთებელი არაფერია, რადგან მაღაზიების პრეზენტაციებზე ცნობად საახებსა და მედიას მუდმივად ეპატიჟებიან.

უცხო არავისთვის არის, რომ მაღაზიის ან ბრენდის პრეზენტაცია ხშირად პომპეზურად, ცნობადი ადამიანებისა და მედიის თანხლებით ხორციელდება. H&M-ის მაღაზიის პრეზენტაციის ეს ასპექტი, არც არავის გაკვირვებია. როგორც სოციალურ ქსელებში წერენ, მათთვის გამაღიზიანებელი ის ფაქტი აღმოჩნდა, რომ ცნობადი სახეებისთვის შოფინგი ცალკე მოეწყო, არაცნობადი სახეები კი ანუ საზოგადოების უმრავლესობა, მაღაზიის პროდუქციის შეძენას სხვა დროს, ორი დღით შემდეგ შეძლებს.

როგორც ფეისბუკზე წერენ, პრეზენტაციის აღნიშნულმა ფორმამ საზოგადოებაში კლასობრივ დაყოფაზე გააკეთა აქცენტი.

„იაფი ტანსაცმელიც ჩაწყობითაა“ - წერენ სოციალურ ქსელში.

ზოგიერთი, აღნიშნულ ფაქტს იუმორისტულად მიუდგა და შესანიშნავი სტატუსიც მიუძღვნა: “ისე უნდა იცხოვრო, უკან რო მოიხედავ h&m-ს გასანაზე როგორ შედიხარ, ეგ უნდა დაინახო."

P.S. როდესაც სტეფან პერსონი ოჯახურ ბიზნესს სათავეში ჩაუდგა და შვედური საზღვრების გარღვევა გადაწყვიტა, 70-იან წლებში H&M-ის პირველი მაღაზია ლონდონში გახსნა. ლონდონელთა მისაზიდად სტეფანი მაღაზიის წინ დადგა და ყველა სტუმარს შვედური პოპულარული ჯგუგის Abba-ს ფირფიტებს ურიგებდა.