რატომ გადაასვენეს ნუცუბიძეზე გარდაცვლილი პაატა პავლიაშვილი რუსთავში - სამხარაულის ექსპერტიზის ეროვნული ბიურო განმარტებას აკეთებს

საზოგადოება - 17:56, 28 Oct, 2017

6353

ლევან სამხარაულის სასამართლო ექსპერტიზის ეროვნული ბიურო ნუცუბიძის ფერდობზე გარდაცვლილი, პაატა პავლიაშვილის ცხედრის სასამართლო-სამედიცინო ექსპერტიზის რუსთავის განყოფილებაში გადასვენების მიზეზებთან დაკავშირებით განმარტებებს აკეთებს.

სამხარაულის ეროვნული ბიურო განმარტავს, რომ ცხედრის რუსთავის ბიუროში გადასვენება განპირობებული იყო ტექნიკური საკითხით.
„სსიპ ლ. სამხარაულის სახელობის სასამართლო ექსპერტიზის ეროვნული ბიურო აკრედიტირებულია საერთაშორისო სტანდარტით (ISO-17025) და ასევე, გახლავთ „სასამართლო ექსპერტიზის დაწესებულებათა ევროპული ქსელის“ (ENFSI) სრულუფლებიანი წევრი. ზემოაღნიშნული ავალდებულებს ბიუროს განუხრელად დაიცვას ყველა ის სტანდარტი, რომელსაც იცავს ENFSI-ის წევრი ქვეყნების საექსპერტო დაწესებულებები.
სტანდარტი გულისხმობს, კონკრეტული ექსპერტიზების ჩატარების წესის დაცვის გარდა, სხვადასხვა ტექნიკური ხასიათის ვალდებულებების შესრულებას, როგორიცაა, მაგალითად შრომის უსაფრთხოების საკითხები. აღნიშნული ყოველწლიურად მკაცრად კონტროლდება აკრედიტაციის ცენტრის მიერ.

ექსპერტიზის ეროვნული ბიუროს სასამართლო-სამედიცინო დეპარტამენტში (თბილისი) მომუშავე პერსონალის უსაფრთხოების და სტანდარტების დაცვის მიზნით, პერიოდულად ხორციელდება ტექნიკური ხასიათის სარემონტო-სარეაბილიტაციო სამუშაოები. მათ შორის, სატვირთო ლიფტის პროფილაქტიკური-სარემონტო სამუშაოები.

სატვირთო ლიფტით სასამართლო-სამედიცინო ექსპერტიზის დეპარტამენტში ხდება გარდაცვლილების გადაყვანა სასექციო განყოფილებაში, რომელიც შენობის მე-4 სართულზე მდებარეობს. შესაბამისად, მნიშვნელოვანია, აღნიშნული ლიფტის გამართულობა.

პროფილაქტიკური სამუშაოების დაგეგმვისას, წინასწარი შეტყობინებით ეცნობება შსს-ს შესაბამის სამსახურებს, რათა კონკრეტულ პერიოდში არ მოხდეს თბილისის დეპარტამენტში ცხედრების შემოყვანა და მათი გადანაწილება განხორციელდეს ექსპერტიზის ეროვნული ბიუროს რუსთავის ან გორის განყოფილებებში.

ა.წ. 19 ოქტომბერს, უმოკლეს ვადაში სატვირთო ლიფტზე გადაუდებელი სამუშაოების ჩატარების მიზნით, 2 დღით ლიფტის გაჩერების მოთხოვნით, ბიუროს მომართა კონტრაქტორმა კომპანიამ - შპს „საქართველოს ლიფტების კომპანია“. ბიუროს მიერ კომპანიას გაეგზავნა საპასუხო წერილი 20 ოქტომბერს, რომელშიც მითითებული იყო, რომ აღნიშნული სამუშაოების ჩატარება შესაძლებელი იქნებოდა ა.წ. 25 ოქტომბრის დილის 09:00 საათიდან 26 ოქტომბრის საღამოს 18:00 საათამდე.

დაგეგმილი სამუშაოების შესახებ ეცნობა შსს-ს შესაბამის სამსახურებს, რათა ამ პერიოდში გარდაცვლილი პირების გადასვენება მომხდარიყო ექსპერტიზის ეროვნული ბიუროს რუსთავის განყოფილებაში. დატვირთვის გაზრდის გამო, თბილისის სასამართლო-სამედიცინო ექსპერტების ნაწილი მივლინებულ იქნა რუსთავის სასამართლო-სამედიცინო განყოფილებაში.

სწორედ ამიტომ, ა.წ. აღნიშნულ პერიოდში გარდაცვლილი 6 პირიდან, მათ შორის ნუცუბიძის ფერდობზე გარდაცვლილი ახალგაზრდა მამაკაცის, პაატა პავლიაშვილის ცხედრის რუსთავის სასამართლო-სამედიცინო ექსპერტიზის განყოფილებაში შეყვანამდე უკვე შეყვანილი იყო 4 გარდაცვლილი პირი და მის შემდგომ ამავე განყოფილებაში შეყვანილ იქნა 2 გარდაცვლილის ცხედარი.

სსიპ ლ. სამხარაულის სასამართლო ექსპერტიზის ეროვნული ბიურო მწუხარებას გამოთქვამს ახალგაზრდის გარდაცვალების გამო და უსამძიმრებს გარდაცვლილის ოჯახს“, - აღნიშნულია ექსპერტიზის ბიუროს მიერ გავრცელებულ განცხადებაში.